لاہور ، وزیراعلیٰ پنجاب سردار عثمان بزدار سے برطانیہ کے ہائی کمشنر تھامس ڈریوکی ملاقات
لاہور میں وزیراعلیٰ پنجاب سردار عثمان بزدار سے برطانیہ کے ہائی کمشنر تھامس ڈریو نے ملاقات کی۔
ترجمان وزیراعلیٰ ہاؤس کے مطابق برطانوی ہائی کمشنر نے وزارت اعلیٰ کا منصب سنبھالنے پر سردار عثمان بزدار کو مبارکباد دی اور نیک خواہشات کا اظہار بھی کیا۔
ملاقات کے دوران باہمی دلچسپی کے امور ، پاک برطانیہ تعلقات کے فروغ اور سماجی شعبوں میں تعاون بڑھانے پر تبادلہ خیال کیا گیا۔
برطانوی ہائی کمشنر کی جانب سے پنجاب حکومت کے ساتھ تعاون کو مزید فروغ دینے کی پیشکش بھی کی گئی۔
اس موقع پر وزیراعلیٰ پنجاب سردار عثمان بزدار نے کہا پاکستان اوربرطانیہ ترقی اورخوشحالی کے سفر میں اہم پارٹنرز ہیں۔پاکستان برطانیہ کے تعلقات کو خصوصی اہمیت دیتا ہے۔ پنجاب میں تعلیم،صحت اور دیگرسماجی شعبوں میں بہتری کیلئے برطانوی تعاون کو قدر کی نگاہ سے دیکھتے ہیں۔امید ہے کہ تحریک انصاف کی حکومت کے دور میں پاکستان اور برطانیہ کے درمیان شراکت داری مزید مضبوط ہوگی۔وزیراعظم عمران خان کی قیادت میں تعلیم، صحت اور دیگر سماجی شعبوں کی ترقی کیلئے نتیجہ خیز حکمت عملی اپنائیں گے۔ ہماری حکومت عوام کی فلاح و بہبود کیلئے کام کرے گی۔ پسماندہ علاقوں کی ترقی پر خصوصی توجہ دیں گے۔چیلنجز کے باوجود سماجی شعبوں کو خوب سے خوب تر بنائیں گے۔
برطانیہ کے ہائی کمشنر تھامس ڈریو نے کہا برطانیہ ترقی اور خوشحالی کے سفر میں نئی حکومت کے ساتھ ہر طرح کا تعاون جاری رکھے گا۔ہم پنجاب حکومت کے ساتھ تعلیم، صحت اور سماجی شعبوں کی ترقی کو فروغ دیں گے۔برطانوی حکومت کاپنجاب کیلئے سب سے بڑا ترقیاتی پروگرام کامیابی سے چل رہا ہے۔ صاف پانی اور ماحولیاتی تبدیلیوں کے حوالے سے بھی شراکت داری بڑھائیں گے۔ تجارت کے فروغ کیلئے اقدامات کرنے کی ضرورت ہے۔ برطانوی وزیراعظم بھی جلد پاکستان کا دورہ کرنے کی خواہش رکھتی ہیں۔ برطانوی وزیر داخلہ اگلے ماہ پاکستان آئیں گے۔پنجاب حکومت کے ساتھ تعلیم، صحت ، سکل ڈویلپمنٹ اور دیگر سماجی شعبوں کی بہتری کیلئے تعاون جاری رکھیں گے۔
ڈیفڈ پنجاب کے نمائندے جنال شاہ اور سیکرٹری وزیراعلیٰ بھی اس موقع پر موجود تھے۔