Sep 13, 2018 04:00 pm
views : 529
Location : Different Areas
karachi- Provincial Minister Saeed Ghani Press Conference
کراچی، صبح نو بجے دفتر نہ آنے والے گھر پر ہی بیٹھ جائیں، وزیر بلدیات سندھ
وزیر بلدیات سندھ سعید غنی کا کہنا ہے کہ اب تمام محکموں میں سربراہان اور گریڈ 17 اور اس کے اوپر کے افسران کو صبح 9.00 بجے آنا ہوگا اور جو نہیں آئے گا وہ اب گھروں کو جائے گا۔ کوئی یہ نہ سمجھیں کہ میں ایک دن آکر اب نہیں آؤں گا بلکہ اب روزانہ صبح 9.00 بجے تمام محکموں کے دفاتر جاؤں گا اور خود حاضری کو یقینی بناؤں گا۔ سندھ بلڈنگ کنٹرول اتھارٹی اور کے ڈی اے دونوں کے ڈی جی دفتر میں موجود نہیں تھے، جس پر ان کے خلاف انکوائری کی جائے گی اور اگر واقعی وہ کسی مٹینگ یا وزٹ پر نہیں ہوں گے تو ان کو شو کاز نوٹس جاری کیا جائے گا۔
واٹر بورڈ، ایس بی سی اے کے مرکزی دفترکے دورے کے بعد ذرائع ابلاغ عامہ کے نمائندوں سے گفتگو کرتے ہوئے سعید غنی کا مزید کہنا تھا کہ گریڈ 17 اور اس کے اوپر کے تمام افسران کو ایس بی سی اے، کے ڈی اے اور ایم ڈی اے میں جمعرات کے روز غیر حاضر ہیں ان کو شوکاز نوٹس کے ساتھ ساتھ ان کی ایک دن کی تنخواہ بھی کاٹی جائے گی اور اس سے نیچے کے ملازمین کو آخری وارننگ دے رہا ہوں کہ وہ اب وقت پر دفتر میں آجائیں۔
وزیر بلدیات جب صبح 9.00 بجے ایس بی سی اے کے مرکزی دفتر واقع سوک سینٹر پہنچے تو وہاں متعدد افسران اور ملازمین غیر حاضر تھے، جس پر انہوں نے شدید برہمی کا اظہار کیا اور تمام کی حاضری رجسٹر منگوا کر خود اپنے ہاتھوں سے ان کی غیر حاضری لگائی۔ اس موقع پر انہیں بتایا گیا کہ ڈی جی صاحب کسی مٹینگ میں گئے ہیں، جس پر انہوں نے متعلقہ افسران کو ہدایات دی کہ وہ اس بات کی انکوائیری کریں کہ وہ کون سے مٹینگ میں گئے ہیں اور اگر یہ بات غلط ثابت ہو تو ان کو بھی شوکاز نوٹس جاری کیا جائے۔