Sep 24, 2018 11:36 am
views : 487
Location : Domestic Place
Lahore- PML N Shahid Khaqan Abbasi Addresses
لاہور، حکومت یوٹرن سے نہیں نظم سے چلتیں ہیں، شاہد خاقان عباسی
قومی اسمبلی کے حلقہ این اے 124 سے پاکستان مسلم لیگ (ن) کے امیدوار سابق وزیر اعظم شاہد خاقان عباسی کا کہنا ہے کہ صرف ایک ماہ گزرا ہے حکومت کو اور اس نے عوام پر مہنگائی کا بوجھ ڈال دیا، دو دن بعد یوٹرن لے لیا جاتا ہے، حکومتیں اس طرح نہیں چلتیں، حکومتیں وہ ہوتی ہیں جو نظم سے کام کرتی ہیں جو مسائل کو حل کرنا جانتی ہیں جو عوام کے درد کو پہنچانتی ہیں اور جو عوامی نمائندہ ہوتی ہیں، چور دروازوں سے آنے والی حکومت کبھی بھی عوام کے مسائل حل نہیں کرسکتی۔
لاہور میں انتخابی مہم کے سلسلے میں منعقدہ جلسے سے خطاب کرتے ہوئے شاہد خاقان عباسی کا مزید کہنا تھا کہ ہمارے قائد نواز شریف کا بیانیہ بڑا واضح ہے، وہ چاہتے ہیں کہ ملک میں حکومت آئین کے مطابق چلے۔
انہوں نے کہا کہ آج اگر کوئی یہ کہے کہ ڈیم میں بنانے جارہا ہوں تو میں صرف اتنی ہی گزارش کروں گا کہ نواز شریف نے جو ڈیموں کیلئے کام کیا پانچ برسوں میں اس کو بھی ضرور دیکھ لیں، یہ صرف سستی شہرت سے عوام کے مسائل حل نہیں ہوتے۔
انہوں نے مزید کہا کہ آج حکومت کسی اور کے پاس ہے، ریکارڈ نکال کر دیکھ لیں، بھاشا ڈیم پر کس نے کام کیا، کتنے پیسے خرچ کئے، ڈیم ایک دن میں نہیں بنتے، ہم نے پاکستان کی تاریخ میں پہلی مرتبہ ملک کو نیشنل واٹر پالیسی دی، جو ڈیم بنانے کی بنیاد تھی، بھاشا ڈیم کر سو ارب سے زیادہ خرچ کیا گیا، بھاشا ڈیم پر پیسہ کا مسئلہ نہیں ہے، پیسہ مل جاتا ہے، پاکستان کے عوام دیں گے، نیت ٹھیک ہونی چاہیے، اگر نیت سستی شہرت حاصل کرنے کی ہے تو سستی شہرت ہی مل پائے گی۔