Sep 27, 2018 07:22 pm
views : 406
Location : Parliament House
Islmabad- Naeem Ul Haq Media Talk
اسلام آباد، ہماری اقتصادی پالیسیوں سے آئندہ پانچ سالوں میں خوشحالی آئے گی، نعیم الحق
پاکستان تحریک انصاف کے رہنماء نعیم الحق کا کہنا ہے کہ گزشتہ چند دنوں سے پاکستان کی ایک سنگین اقتصادی صورتحال کے حوالے سے جو ہماری حکومت نے بجٹ پیش کیا ہے اس پر قومی اسمبلی میں بحث ہورہی ہے، آج میں یہ کہنا چاہتا ہوں کہ ہمیں آئے ہوئے تقریباً ایک ماہ سے کچھ دن زیادہ ہوئے ہیں اور یقین جانیئے روزانہ ہمیں سابق حکومت کی فضول خرچی اور شاہانہ ٹھاٹ بھاٹ کی نئی معلومات حاصل ہوتی ہیں ، پاکستانی قوم کی دولت کو بے رحمی سے لٹانا قابل مذمت ہے۔
پارلیمنٹ ہاؤس کے باہر ذرائع ابلاغ عامہ کے نمائندوں سے گفتگو کرتے ہوئے نعیم الحق کا مزید کہنا تھاکہ ہمیں خزانہ بالکل خالی ملا ہے، اس وقت ہم پوری کوشش کررہے ہیں کہ اخراجات پورے اور اپنی ذمہ داریاں پوری کرنے کیلئے ہم ان محدو مالی وسائل کو استعمال کریں جو اس وقت ہماری حکومت کو میسر ہے ۔ آئندہ پانچ سالوں میں وہ اقتصادی پالیسیاں جن کا آغاز اب ہماری حکومت میں ہورہا ہے اس کے نتیجے میں پانچ سال کے اندر اندر پاکستان ایک خوشحال ملک بنے گااور عوام کی زندگی میں ہر لحاظ سے بہتری آئے گی۔
ان کا مزید کہنا تھا کہ پاکستان کو بحران سے نکالنے کیلئے بیل آؤٹ پیکج سمیت مختلف آپشنز موجود ہیں، عالمی مالیاتی فنڈز کے لوگ پاکستان آئے ہوئے ہیں انہوں نے پہلے بھی پاکستان کو بحران سے نکالا ہے، ہماری حکومت ان سے گفت وشنید کررہی ہے، ہم جو بھی فیصلہ کریں گے وہ عوام اور پاکستان کے مفاد میں کریں گے کیونکہ ہم واقعی چاہتے ہیں کہ ہمارے مقاصد اور عزائم پاکستان کے عوام کی فلاح وبہبود کے حوالے سے ان میں کسی قسم کی کوئی رکاوٹ نہ ہو۔