Dec 22, 2019 01:34 pm
views : 266
Location : Different Places
Lahore- 7 Injured in Different areas of punjab due to fog
لاہور، پنجاب کے مختلف علاقوں دھند کا راج ،ٹریفک حادثات میں سات افراد زخمی
پنجاب اور سندھ کے اکثر شہر آج بھی دھند کی لپیٹ میں ہیں، پنجاب میں دھند کے باعث پیش آنے والے 2 ٹریفک حادثات میں 7 افراد زخمی ہو گئے۔
پنجاب کے اکثر میدانی علاقے دُھند کی لپیٹ میں ہیں، پنجاب کے شہر وہاڑی میں دھند کے باعث 4 گاڑیاں ٹکرا گئیں جس کے نتیجے میں 5 افراد زخمی ہو گئے جنہیں طبی امداد کے لیے اسپتال منتقل کیا گیا ہے۔
ادھر چیچہ وطنی میں پیش آنے والے ٹریفک حادثے میں 2 مسافر زخمی ہوئے، جنہیں اسپتال منتقل کر کے طبی امداد دی گئی۔
حافظ آباد، دھند کے باعث باراتیوں کی بس حادثے کا شکار، 5 جاں بحق
لاہور اور اس کے اردگرد کے علاقوں میں شدید دھند چھائی ہوئی ہے جس سے ٹریفک کی روانی شدید متاثر ہو رہی ہے۔
ٹھوکر نیاز بیگ، چوہنگ، موہلنوال، مراکہ، مانگا منڈی، چیچہ وطنی، میاں چنوں، پتوکی، اوکاڑہ، ساہیوال، ہڑپہ، خانیوال، ملتان، بستی ملوک، لودھراں، حبیب آباد، رینالہ، گیمبر، میر داد مافی، پھول نگر، کسووال، بہاولپور، احمد پور شرقیہ، ترنڈہ محمد پناہ، رحیم یار خان، صادق آباد میں بھی شدید دھند کا راج ہے۔
لاہور میں شدید دھند کی وجہ سے حدِ نگاہ کم ہو کر 300میٹر جبکہ لاہور ائیرپورٹ پر 30میٹر ریکارڈ کی گئی۔
موٹروے پولیس نے موٹر وے سمیت مختلف سڑکوں پر سفر کرنے والے شہریوں کو ہدایت کی ہے کہ تیز رفتاری سے پرہیز کریں اور اگلی گاڑی سے مناسب فاصلہ رکھیں، معلومات اور مدد کے لیے ہیلپ لائن 130 سے رابطہ کریں۔