اسلام آباد،غریبوں کے لیے راشن کارڈ متعارف کرانے جا رہے ہیں،وزیراعظم
وزیراعظم عمران خان کا کہنا ہے کہ غریبوں کے لیے راشن کارڈ متعارف کرانے جا رہے ہیں، راشن کارڈ کے ذریعے غریب طبقہ 3 ہزارتک رعایت پر چیزیں خرید سکے گا۔
تفصیلات کےمطابق وزیراعظم عمران خان نے وفاقی دارالحکومت اسلام آباد میں یوٹیلیٹی اسٹورز کا دورہ کیا، وزیراعظم نے یوٹیلیٹی اسٹورز میں موجود اشیاء کا جائزہ لیا۔
وزیراعظم عمران خان نے کہا کہ مشکل وقت میں لوگوں کے لیے یوٹیلیٹی اسٹور میں سستی چیزیں لائے، کوشش کریں گے چیزوں کی قیمتیں مزید کم کی جائیں۔ انہوں نے کہا کہ کوشش کریں گےہمیں چیزیں درآمدکرنےکی ضرورت نہ ہو، درآمد پرکم توجہ دیں گے تاکہ ہم اپنی پیداوار بڑھا سکیں ۔
وزیراعظم نے کہا کہ غریبوں کے لیے راشن کارڈ متعارف کرانے جا رہے ہیں، راشن کارڈ کے ذریعے غریب طبقہ 3 ہزارتک رعایت پر چیزیں خرید سکے گا۔
انہوں نے کہا کہ مڈل مین درمیان میں بہت منافع کماتا ہے، مڈل مین بہت بڑا نفع کما رہا ہے، قیمتوں میں فرق آتا ہے، مارکیٹ کو ریگولیٹ کرنے کے لیے یوٹیلیٹی اسٹور بہترین آپشن ہے۔
وزیراعظم عمران خان نے کہا کہ رواں سال روزگار پیدا کریں گے، مسائل کا خاتمہ ترجیح ہے، یوٹیلیٹی اسٹورمیں بڑا پیسہ لگائیں گے تا کہ لوگوں کو سہولت ملے۔