کراچی ، تین روزہ پاک واٹر ایکسپو اختتام پذیر، تین کروڑ روپے کے سودے
کراچی میں تین روزہ پاک واٹر ایکسپو تین کروڑ روپے کے کاروباری سودوں کے
ساتھ یکسپو سینٹر کراچی میں اختتام پذیر ہو گیا۔یہ نمائش پرائم ایونٹ
مینجمنٹ کی جانب سے منعقد کی گئی ہے۔ اختتامی تقریب کے مہمان خصوصی کراچی
میٹروپولیٹن کارپوریشن ( کے ایم سی ) کے ڈپٹی میئرڈاکٹر ارشد عبداللہ وہرہ
تھے جنہوں نے ملکی و غیر ملکی کمپنیوں کے اسٹالز کا دورہ کیا اور شرکاء میں
شیلڈز تقسیم کیں۔
اس دوران صحافیوں سے گفت گو کرتے ہوئے ڈاکٹر ارشد وہرہ نے کہا کہ کراچی
واٹراینڈ سیوریج بورڈ پورے شہر کا سیوریج نظام تبدیل کرے تاکہ کے
فورمنصوبے کے ثمرات مل سکیں۔ اس کی تکمیل میں بھی دو ڈھائی سال لگ جائیں
گے۔ پانی اور سیوریج کی لائنیں آپس میں شامل ہورہی ہیں جس سے پیٹ کی
بیماریاں بڑھ گئی ہیں۔ بچے زیادہ متاثر ہیں۔ واٹر بورڈ نے اپنی ذمہ داریاں
صحیح طریقے سے ادا نہیں کیں۔ اس مسئلے کو حل کرنے کے لیے وفاق ہماری مدد
کرے۔
ڈپٹی میئرڈاکٹر ارشد عبداللہ وہرہ نے کہا کہ پاک واٹر ایکسپو جیسی نمائشیں
سال میں دو بار ہونی چاہیءں۔ ایک سوال کے جواب میں انہوں نے کہا کہ انہوں
نے وفاق سے درخواست کی تھی کہ کراچی سرکلر ریلوے کو پاک، چین اقتصادی
راہداری میں شامل کیا جائے جس پر عمل ہورہا ہے۔ میئر کراچی وسیم اختر کی
جانب سے شہر کے حوالے سے دی گئی تجاویز پر فوری عملدرآمد کرایا جائے۔ شہر
کو ڈی سیلینیشن کی نہیں بلکہ پانی کے دوبارہ استعمال کے منصوبوں کی ضرورت
ہے۔ پاکستان پیپلز پارٹی نے اپنے ادوار میں کراچی کے شہریوں کی ضروریات کو
پورا نہیں کیا۔ چیئرمین پی پی پی بلاول بھٹو کی دلچسپی کے باعث اب کراچی پر
توجہ دینے کی کوشش کی جارہی ہے۔
ڈپٹی میئرڈاکٹر ارشد عبداللہ وہرہ نے کہا کہ انہوں نے شہر کی 209میں سے
علامتی طور پر 18یونین کونسلوں میں صفائی مہم شروع کی ہے ۔ اب اس سے تو
پورا شہر صاف نظر نہیں آئے گا۔ کچھ لوگ اس کو غلط رنگ دے رہے ہیں۔ ہم اپنے
پورے وسائل استعمال کر رہے ہیں۔ صفائی مہم بتدریج شہر بھر میں چلائی جائے
گی۔