Jan 16, 2017 03:49 pm
views : 971
Location : Supreme Court of Pakistan
Islamabad- PML(N) Leader Maryam Auranzeb and Talal Chaudrhy Media Talk
اسلام آباد، پاناما کیس میں عمران خان نے ثبوت نہیں جھوٹ جمع کرائے ہیں،مریم اورنگزیب
وزیرمملکت اطلاعات مریم اورنگزیب کا کہناتھا کہ پاناما کیس میں عمران خان نے ثبوت نہیں جھوٹ جمع کرائے ہیں۔
سپریم کورٹ کے باہر میڈیا سے بات کرتے ہوئے وزیر اطلاعات و نشریات مریم
اورنگزیب کا کہنا تھا کہ پاناما کیس سے وزیراعظم نواز شریف کا کوئی تعلق
نہیں لیکن اس کے باوجود عمران خان ملک کے منتخب وزیراعظم سے ان کے والد کا
1937 کا حساب مانگ رہے ہیں جو عدالت میں جمع بھی کرایا جا رہا ہے۔
وزیرمملکت اطلاعات مریم اورنگزیب کا کہنا تھا کہ عمران خان نے کہا کہ
وزیراعظم کے وکیل کے دلائل کے دوران وہ ویڈیو گیم کھیل رہے تھے، میرے خیال
میں تو عمران خان ساڑھے 3 سال سے ویڈیو گیم کھیل رہے ہیں اور پاناما کیس کے
بعد 2018 تک وہ ویڈیو گیم ہی کھیلتے رہیں گے۔
وزیرمملکت اطلاعات مریم اورنگزیب نے کہا کہ پارلیمنٹ میں اظہار خیال ہو یا
قوم سے خطاب وزیراعظم نواز شریف نے کسی قسم کا جھوٹ نہیں بولا کیونکہ
وزیراعظم جھوٹ بولنے کے عادی نہیں ہیں۔ انہوں نے کہا کہ وزیراعظم نے کوئی
جھوٹ نہیں بولا اور اگر عمران خان چاہتے ہیں کہ وزیراعظم کو اس بنا پر
نااہل قرار دے دیا جائے کیونکہ انہوں نے پارلیمنٹ میں جھوٹ بولا تو ایسا ہو
نہیں سکتا۔ عدالت میں قانونی کیس چل رہا ہے اور وہاں خواہشات کی بنا پر
نہیں شواہد کی بنیاد پر فیصلے ہوتے ہیں۔
پاکستان مسلم لیگ (ن) کے رہنما طلال چوہدری نے کہا کہ جیسے جیسے موسم سرد
ہوتا جا رہا ہے عمران خان کے ارمان بھی ٹھنڈے ہوتے جا رہے ہیں، ہر گزرتے دن
کے ساتھ عمران خان کیس ہارنے کی جانب بڑھ رہے ہیں، عمران خان روزانہ بی بی
سی کہہ کر قوم کے سامنے اپنا منہ چھپانا چاہتے ہیں، جن لوگوں نے عدالت میں
ثبوتوں کی اے بی سی بھی جمع نہیں کرائی وہ بی بی سی بی بی سی کہہ کر خود
کو سچا ثابت کرنے کی کوشش کر رہے ہیں۔
پاکستان مسلم لیگ (ن) کے رہنما طلال چوہدری کا کہنا تھا کہ بی بی سی نے
وہی موقف اپنایا جو حسین نواز نے عدالت میں دیا، اگر عمران خان نے حسین
نواز کا عدالت میں جمع کرایا گیا جواب پڑھا ہوتا تو بی بی سی کی رپورٹ دیکھ
کر اس طرح نہ اچھل رہے ہوتے۔
پاکستان مسلم لیگ (ن) کے رہنما طلال چوہدری کا کہنا تھا کہ عمران خان عدالت
کے باہر ہر ہفتے ایک کیس کا فیصلہ سنا دیتے ہیں لیکن عدالت کے اندر سر بھی
اوپر نہیں اٹھا سکتے کیونکہ انہوں نے عدالت میں ثبوت نہیں جھوٹ جمع کرائے
ہیں۔ ہمارے وکیل نے قانون کی کتابیں پڑھی ہیں جبکہ عمران خان کے وکیل نے
ردی کی کتابیں پڑھی ہیں اور عدالت میں فیصلہ قانون کی کتابوں کے ذریعے ہوتا
ہے۔
پاکستان مسلم لیگ (ن) کے رہنما طلال چوہدری نے کہا کہ جب سے نیا سال شروع
ہوا ہے عمران خان ہر روز نیا جھوٹ بول رہے ہیں، 2016 تک نواز شریف سے ڈرنے
والے 18-2017 میں مریم نواز سے بھی خوفزدہ ہیں۔
پاکستان مسلم لیگ (ن) کے رہنما طلال چوہدری نے مزید کہا کہ عوام کام کو
ووٹ دیتی ہے الزام کو نہیں، کام پہلے بھی جیتا ہے اور 2018 میں بھی نواز
شریف کے کام ہی جیتیں گے۔