لاہور،وزیراعلیٰ پنجاب محمد شہباز شریف سے رکن قومی اسمبلی دانیال عزیز کی ملاقات
لاہور میں وزیراعلیٰ پنجاب محمد شہباز شریف سے رکن قومی اسمبلی دانیال عزیز
نے ملاقات کی۔دونوں رہنماؤں کی وزیر اعلیٰ ہاؤس لاہور میں ملاقات ہو ئی۔
اس موقع پر وزیراعلیٰ پنجاب محمد شہبازشریف کا کہناتھا کہ وسائل قوم کی
امانت ہیں اوراسے عوام کو سہولتوں کی فراہمی پر خرچ کرتے رہیں گے۔میٹروبس
سسٹم اور اورنج لائن میٹروٹرین جیسے منصوبے وسائل عوام پر صرف کرنے کی اعلی
مثالیں ہیں۔میٹروبس سسٹم کی زبردست پذیرائی درحقیقت کامیاب منصوبے کیلئے
عوام کی گواہی ہے۔
وزیراعلیٰ پنجاب محمد شہبازشریف کا کہناتھا کہ میٹروبس سروس کے جدید نظام
کے ذریعے روزانہ لاکھوں افراد بروقت اپنی منزل پر پہنچ رہے ہیں۔جدید
میٹروبس سسٹم نے عوام کیلئے آمد و رفت میں آسانیاں پیدا کی ہیں۔مفاد عامہ
کے منصوبوں پربلاجواز تنقید کرنیوالے عوام کی ترقی اورخوشحالی کے دشمن ہیں۔
وزیراعلیٰ پنجاب محمد شہبازشریف کا کہناتھا کہ عام آدمی کی فلاح و بہبود کے
منصوبوں میں رکاوٹیں کھڑی کرنیوالوں کو غریب عوام کی محرومیوں کا خاتمہ
برداشت نہیں۔میٹروبس سروس کے نظام پرتنقید کرنیوالوں کی زبانیں منصوبے کی
کامیابی پر بند ہوچکی ہیں۔اورنج لائن میٹروٹرین کے منصوبے کی مخالفت
کرنیوالوں کی زبانیں بھی منصوبے کی تکمیل پر بند ہوجائیں گی۔
وزیراعلیٰ پنجاب محمد شہبازشریف کا کہناتھا کہ ترقیاتی منصوبوں کے مخالفین
نہیں چاہتے کہ عوام خوشحال ہوں اور ملک ترقی کرے۔دور آمریت میں پنجاب کے
سابق حکمرانوں نے منصوبوں کے نام پر کرپشن کے قبرستان بنائے۔پاکستان مسلم
لیگ کی حکومت نے ان کرپشن کے قبرستانوں کو ترقی کے میناروں میں بدل دیا ہے۔
وزیراعلیٰ پنجاب محمد شہبازشریف کا کہناتھا کہ سابق حکمرانوں نے عوام کو
مسائل سے نکالنے کی بجائے اپنی لوٹ مار اورکرپشن کی وجہ سے ان کے مسائل میں
اضافہ کیا۔مٹھی بھرعناصرعام آدمی کی ترقی کی مخالفت کرتے رہیں،ہم عوامی
خدمت کا بے لوث سفر جاری رکھیں گے۔
وزیراعلیٰ پنجاب محمد شہبازشریف کا مزید کہناتھا کہ وزیراعظم نوازشریف کی قیادت میں عوامی خدمت کے نئے ریکارڈ قائم کریں گے۔