Feb 06, 2019 07:37 pm
views : 524
Location : Domestic Place
Karachi- Pakistan's School going children work to support poor families
کراچی، تعلیم کی ضرورت کو محسوس کرتے ہوئے سفید پوش گھرانوں کے محنت کش بچے حصول تعلیم کی جدوجہد میں مصروف عمل
اس بات میں کوئی ابہام نہیں کہ تعلیم کسی بھی معاشرے کی ترقی میں بہت کلیدی
کردار ادا کرتی ہے۔ تعلیم کے زیور سے آراستہ لوگوں کا مقام معاشرے میں
ہمیشہ مقدم رہتا ہے اور بلا شبہ تعلیم معاملہ فہمی کا ادراک کرنے میں معاون
ثابت ہوتی ہے۔ یہی وجہ ہے کہ تعلیم کی ضرورت کو محسوس کرتے ہوئے سفید پوش
گھرانوں کے محنت کش بچے حصول تعلیم کی جدوجہد میں مصروف عمل ہیں۔ دن بھر
محنت مزدوری کرکے اپنے اسکولوں کی فیسیں اور اپنا گھر چلانے کی جہد میں پیش
پیش ہیں۔
کراچی شہر کی کوثر نیازی کالونی میں واقع پیراماؤنٹ اسکول کے پرنسپل ولید
اقبال کا کہنا تھا کہ آج سے دس سال قبل ایک کرائے کی عمارت میں پیراماؤنٹ
اسکول قائم کیا گیا تھا، یہ اسکول پسماندہ اور تعلیم سے بے بہرہ لوگوں
کیلئے مشعل راہ بن چکا ہے۔ جہاں لوگ ابتداء ہی سے اپنے بچوں کو تعلیم کی
بجائے حصول آمدنی کا ذریعہ سمجھتے تھے، اب یہ اسکول ایک پودے سے درخت بننا
شروع ہوگیا ہے، جہاں لوگ بھی چاہتے ہیں کہ اپنے بچوں کو تعلیم یافتہ
بناسکیں ۔
ان کا مزید کہنا تھا کہ پہلے یہ اسکول پرائمری ، پھر پری پرائمری اور اب مڈل کی سطح پر قائم کیا گیا ہے۔
ایک طالبعلم مدثر نیاز کا کہنا تھا کہ میں چھٹی جماعت کا طالبعلم ہوں، میرا
اسکول غریب بستی میں ہے، میں اسکول کے بعد کام کرتا ہوں، کبھی دھوبی، کھبی
الیکٹرانک کا کام کرکے اپنے اسکول کی فیس اور اپنا گھر چلاتا ہوں۔
ایک اور طالبعلم محمد افضال کا کہنا تھا کہ میں تیسری جماعت کا طالبعلم
ہوں، اسکول کے بعد کام کرتا ہوں، محنت مزدوری کرکے اپنے اسکول کے اخراجات
پورے کرتا ہوں۔