سروز کا شمار اگرچہ لوک موسیقی کے قدیم ترین سازوں میں ہوتا ہے لیکن اس کا
سحر طاری کرنے والی آواز کی طاقت میں کوئی کمی نہیں آئی ۔مخصوص ڈیزائن کے
ساتھ لکڑی، چند تاروں اور ایک چھوٹی سی پوست پر مشتمل اس ساز کے بغیر
بلوچستان کے قبائلی معاشرے کی لوک موسیقی نامکمل ہے۔اگر یہ کسی ماہر کے
ہاتھ میں ہوتو کسی اور آلۂ موسیقی کی تشنگی محسوس نہیں ہوتی بلکہ اکیلا ہی
کئی دھنیں بجانے کیلئے کافی ہوتا ہے تاہم اس کے ساتھ اگر طنبورہ یا کوئی
اور ساز بجایا جائے تو یہ لطف کو دوبالا کرتا ہے۔سروز کی طرح چنگ کا شمار
بھی بلوچستان کے لوک موسیقی کے قدیم ترین آلات میں ہوتا ہے۔ مکمل طور پر
لوہے پر مشتمل یہ چھوٹا سا ساز جیب میں بھی آتا ہے۔
عنایت اللہ لہڑی
بلوچستان میں لوک موسیقی کے واحد ایم فل اسکالر ہیں۔وہ کہتے ہیں کہ سروز
اور چنگ روایتی ساز ہیں جو ہزاروں سال سے ہماری تہذیب کے ساتھ سفر کرتے چلے
آرہے ہیں تاہم آج کل یہ معدوم ہوتے جارہے ہیں جس کی بہت
ساری وجوہات میں سے ایک وجہ توجہ نہ ہونا اور موسیقی کے نئے نئے آلات کی
آمد ہے۔وہ ان کے معدومی کو روایات مسخ کرنے سے تعبیر کرتے ہیں۔
ان کا کہنا
ہے کہ اگر قوم یا نسل کی تاریخ کو مسخ کرنا ہے تو ان کو ان کے موسیقی کے
آلات سے بیگانہ کرو۔ اگر ان کے موسیقار اور ان کے جتنے بھی موسیقی کے آلات
ہیں وہ ختم ہوگئے تو ان کا کیا ہوگا۔ اگر لوک گیتوں
میں سروز، چنگ یا طنبورہ نہیں ہو گا تو اسے لوک موسیقی سمجھا ہی نہیں جائے
گا۔ سروز بنانے کے طریقے مختلف ہیں اور مختلف لکڑیوں سے
بنتا ہے۔ اس کے ساتھ کچھ تار ہوتے ہیں جبکہ ایک چھوٹی سا پوست بھی ہوتی ہے۔
عنایت
لہڑی نے بتایا کہ یہ ایک مکمل سبتک کا ساز ہے اور اسے بجانے کیلئے کمان
نما ایک اور چیز بھی ہوتی ہے۔ہم لوگ گز بولتے ہیں اس کے جس حصے کو سروز پر
پھیرا جاتا ہے وہ گھوڑے کی دم کے بال سے بنا ہوتا ہےجہاں اس آلہ موسیقی سے
نکلنے والی دھنیں سحر طاری کرتی ہیں وہاں اس کی مختلف شکلیں بھی ہوتی ہیں۔
ان کا کہنا ہے کہ اگر اسے کھڑا کرکے سامنے سے دیکھا جائے تو یہ ایک چٹان پر
بیٹھے شاہین کی مانند ہوتا ہے۔اگر زمین پر رکھ کر سامنے سے دیکھا جائے تو
یہ کشتی لگتا ہے اور اگر اسے الٹا کر کے دیکھا جائے توکچھوے کی طرح نظر آتا
ہے۔ انہوں کہا کہ چنگ بھی ہماری تہذیب کا حصہ ہے۔ یہ ایک قدیم ساز ہے جو
کہ لوہے سے بنتا ہے۔
عنایت لہڑی کا کہنا ہے کہ ان کے بنانے والے ہمارے سرمست قبیلے کے لوگ ہیں۔
وہ ابھی بھی اسے بناتے ہیں لیکن اب اس کے بنانے والے بہت کم ہو گئے
ہیں۔ انہوں نے اسے تنہائی کا بہترین ساتھی قرار دیتے ہوئے کہا کہ اس کو
اٹھانے کیلئے زحمت نہیں کرنا پڑتی بلکہ یہ جیب میں آتا ہے۔ اسے بجانے والے چرواہے یا کسان ہوتے ہیں جو اپنے دیہات میں کاشت کاری یا
سفر کے دوران اسے بجاتے ہیں۔
عنایت لہڑی نے نئی نسل کو ان سازوں سے متعارف
اور آشنا کروانے کیلئے ایک ادارہ بھی کھولا ہے۔وہ کہتے ہیں کہ جب وہ
نوجوانوں کو یہ ساز بجاتے اور اسے سیکھتے دیکھتے ہیں تو انھیں سکون ملتا
ہے۔ نوجوانوں کو
اکٹھا کرنے کا مقصد ان کو بھی بچانا ہے اور اپنے موسیقی کےآلات کو بھی
بچانا ہے تاکہ یہ ہمیشہ کیلئے زندہ رہیں۔
ایک
شاگرد نسیمہ اعجاز کا کہنا تھا کہ ہمیں اس ادارے میں آکر ایک گھر جیسا
ماحول ملا میں بنیادی طور پر موسیقی سیکھنا چاہتی تھی لیکن اب سروز بھی
سیکھنا شروع کردیا ہے۔