کراچی، یوم پاکستان کے موقع پر میئر کراچی اور آئی جی سندھ کی مزار قائد پر حاضری
یوم پاکستان کے موقع پر میئر کراچی وسیم اختر اور آئی جی سندھ کلیم امام نے
ایڈیشنل آئی جی کراچی امیر شیخ اور دیگر اعلیٰ پولیس افسران کے ہمراہ مزار
قائد پر حاضری دی اور پھولوں چڑھائے۔ اس موقعہ پر فاتحہ خوانی بھی کی گئی۔
مزار پر حاضری کے بعد ذرائع ابلاغ عامہ کے نمائندوں سے گفتگو کرتے ہوئے
میئر کراچی وسیم اختر کا کہنا تھا کہ 23 مارچ کا دن میں سمجھتا ہوں کہ
ہمارے لئے ایک مشعل ہے جو 1940ء کو جلائی گئی تھی قرارداد لاہور کی شکل میں
اور اس کے بعد جو جدوجہد کی گئی ایک آزاد مملکت کیلئے وہ آج ہم سب کے
سامنے ہے اور ہم سب آزادی کے ساتھ یہاں اپنی زندگی بسر کررہے ہیں مگر افسوس
کہ آج بھی وہ عناصر جو اس ملک کو پھلتا پھولتا نہیں دیکھنا چاہتے ہمارے
ملک اور شہروں کے خلاف سازشوں میں مصروف ہیں۔
اس موقع پر آئی جی سندھ کلیم امام کا کہنا تھا کہ سندھ پولیس کے ڈھائی ہزا ر
سے زیادہ اہلکاروں نے شہادت پائی ہے اور ہزاروں ایسے لوگ ہیں جو کہ شدید
زخمی ہوئے ہیں، یہ وہ فورس ہے جس نے اس شہر میں امن قائم کیا ہے، افسران وہ
لوگ ہیں جو دن رات محنت کرتے ہیں اور لوگوں کیلئے اپنی جان کی پرواہ نہیں
کرتے، کل بھی ہمارے کانسٹیبل نے شہادت دی ہے، ہم ہر وہ اقدام کریں گے جس سے
ہمارے عوام کو فائدہ ہو، جس مقصد کیلئے پولیس قائم کی گئی ہے ہم اس پر
پورا اتریں گے، میں اللہ تعالیٰ کا شکر ادا کرتا ہوں کہ اس نے ایک آزاد ملک
دیا ہے اور ہمیں کام کرنے کا موقع دیا ہے ،پاکستان نے بہت ترقی کی ہے،
ہمیں مزید محنت کرنے کی ضرورت ہے سندھ پولیس اس میں بھرپور کردار ادا کرے
گی تاکہ ملکی ترقی میں ہم مزید شامل ہوں۔