وزیر اعظم پاکستان عمران خان اور ڈی جی آئی ایس پی آر کی گرین شرٹس کو تاریخی فتح پر مبارک باد
وزیر اعظم پاکستان عمران خان اور ڈی جی آئی ایس پی آر کی جانب سے گرین شرٹس کو تاریخی فتح پر مبارک باد دی گئی۔
تفصیلات کے مطابق گرین شرٹس نے جمود توڑ دیا، گیارہ میچز میں شکست کے بعد ورلڈ کپ کی فیورٹ ٹیم انگلینڈ کو 14 رنز سے شکست دے دی۔
وزیر اعظم نے اس فتح پر ٹیم کو مبارک باد دیتے ہوئے کہا کہ ایک کمزورآغاز کے بعد یہ ورلڈ کپ میں پہلی فتح ہے۔
وزیر اعظم نے کہا کہ پاکستانی ٹیم تم میں ٹیلنٹ ہے، بس خود پر بھروسہ کرو، تم آخرتک جا سکتے ہو۔
ڈی جی آئی ایس پی آر میجرجنرل آصف غفور نے بھی قومی کرکٹ ٹیم کو سراہا ہے اور مبارک باد دی ہے۔
ڈی جی آئی ایس پی آرمیجرجنرل آصف غفور نے کہا کہ پاکستانی ٹیم بہت اچھا کھیلی، میجر جنرل آصف غفور نے آئندہ میچز میں ٹیم کے لئے نیک خواہشات کا اظہار کیا، ساتھ ہی عید کی مبارک باد دی۔
خیال رہے کہ ورلڈ کپ کے اولین میچ میں پاکستان کو ویسٹ انڈیز کے خلاف عبرت ناک شکست کا سامنا کرنا پڑا تھا، جس کی وجہ سے ٹیم کا مورال ڈاؤن تھا، البتہ آج پاکستان نے شان دار کم بیک کیا ہے۔