اسلام آباد،نواز شریف، شہباز شریف، حمزہ میں ایک ہیں،مریم نواز
مسلم لیگ ن کی نائب صدر مریم نواز نے کہا ہے کہ نواز شریف، شہباز شریف، حمزہ میں ایک ہیں، کوئی اختلاف نہیں، پوری پارٹی کا نواز شریف اور شہباز شریف پر بھرپور اعتماد ہے۔
تفصیلات کے مطابق مسلم لیگ ن کی نائب صدر مریم نواز نے اے پی سی کے بعد میڈیا سے گفتگو کرتے ہوئے کہا کہ پوری پارٹی کا نواز شریف اور شہباز شریف پر بھرپور اعتماد ہے، ہم ایک دوسرے کے ساتھ اختلاف تو کرسکتے ہیں، فیصلہ لیڈر شپ کا ہوتا ہے جو خوش دلی سے قبول ہوتا ہے۔
مریم نواز نے کہا کہ میں سمجھتی ہوں کہ اس حکومت کو قبول نہیں کرنا چاہئے، جتنے دن حکومت رہے گی ملکی صورت حال دگرگوں رہے گی، خدانخواستہ ایسا نہ ہو پاکستان پوائنٹ آف نو ریٹرن پر پہنچ جائے۔
انہوں نے کہا کہ چیئرمین سینیٹ صادق سنجرانی کو ہٹانے سے تمام مسائل تو حل نہیں ہوں گے تاہم ان کو ہٹانے سے حکومت لرز جائے گی۔
مسلم لیگ ن کی نائب صدر کا کہنا تھا کہ ایک دن میں پانچ پانچ روپے کی قدر گر رہی ہے، ڈالر بڑھ رہا ہے، صرف جون میں 14 ارب قرضوں میں اضافہ ہوا، ہر روز عوام نئے بجٹ کی وجہ سے پس رہے ہیں۔
مریم نواز نے کہا کہ بجلی، گیس، آتا مہنگا، عوام کی زندگی جہنم بن گئی ہے، اسپتال میں مفت ادویات بند، دواؤں کی قیمتیں آسمان پر ہیں، لوگ علاج کرائیں یا بچوں کی فیسیں دیں، کیا کریں۔