کراچی،ڈپٹی کمانڈر رائل سعودی نیول فورس نے نیول ہیڈ کوارٹرز اسلام آباد کا دورہ
ڈپٹی کمانڈر رائل سعودی نیول فورس نے نیول ہیڈ کوارٹرز اسلام آباد کا دورہ کیا جہاں ان کی پاک بحریہ کے سربراہ ایڈمرل ظفر محمود عباسی سے ملاقات ہوئی۔
تفصیلات کے مطابق ترجمان بحریہ کا کہنا ہے کہ رائل سعودی نیول فورس کے وفد نے نیول ہیڈ کوارٹرز اسلام آباد کا دورہ کیا۔ وفد کے سربراہ ڈپٹی کمانڈر رائل سعودی نیول فورس نے پاک بحریہ کے سربراہ ایڈمرل ظفر محمود عباسی سے ملاقات کی۔
ترجمان کے مطابق ملاقات کے دوران باہمی دلچسپی کے امور زیر بحث رہے۔ نیول چیف نے خطے کی بحری سیکیورٹی میں پاکستان بحریہ کے کردار پر روشنی ڈالی۔
نیول چیف نے بحر ہند میں پاک بحریہ کے ریجنل میری ٹائم سیکیورٹی پٹرول کے اقدام سے بھی آگاہ کیا۔
ڈپٹی کمانڈر رائل سعودی نیول فورس نے خطے میں امن و استحکام کے قیام کے سلسلے میں پاک بحریہ کے کردار کو سراہا۔
اس سے قبل ایک تقریب سے خطاب میں نیول چیف کا کہنا تھا کہ پاک بحریہ کو ناقابل تسخیر فورس بنانے کے لیے کام کر رہے ہیں، میری ٹائم سیکیورٹی چیلنجز سے نمٹنے کے لیے تیار ہے، سی پیک اور گوادر بندر گاہ سے بے پناہ سمندری وسائل جڑے ہیں۔
انہوں نے کہا تھا کہ سی پیک سے ہمیں من حیث القوم استفادے کی ضرورت ہے، وسائل کے حصول اور دنیا پر اپنی بالا دستی قائم کرنے کے لیے ملکوں کے درمیان نئی صف بندیاں ہو رہی ہیں۔
نیول چیف کا کہنا تھا کہ پاکستان کے پاس بیش بہا بحری وسائل موجود ہیں۔ بحری وسائل استعمال کر کے ملکی معیشت کو مضبوط کیا جا سکتا ہے۔