اسلام آباد، وزیراعظم عمران خان کی چھمب سیکٹرکے قریب دھماکے کی شدید مذمت
چھمب سیکٹر میں شہید پاک فوج کے جوان شیر زمان اور غلام قاسم ، محمد طیب اور صوبیدار محمد صادق کوپورے فوجی اعزاز کےساتھ آبائی علاقوں میں سپردخاک کردیاگیا۔
تفصیلات کے مطابق ایل اوسی پردھماکے میں شہید کرک کےجوان شیر زمان کی نماز جنارہ ادا کی گئی، نماز جنازہ میں بڑی تعداد میں فوجی، سیاسی وسماجی شخصیات نےشرکت کی۔
نماز جنازہ کے بعد شیر زمان کو آبائی قبرستان میں فوجی اعزاز کے ساتھ سپردخاک کردیا گیا، شہید کی قبر پر پھولوں کی چادر چڑھائی گئی اور فوجی دستے نے سلامی دی، شہید نے پسماندگان میں 2 بیٹے، بیٹی، بیوہ اور والد کو چھوڑا ہے۔
سرگودھا کی تحصیل ساہیوال سےتعلق رکھنےوالے چھمب سیکٹر میں شہید پاک فوج کے سپاہی غلام قاسم کی نماز جنازہ رات گئے ادا کی گئی، جس میں گارڈ آف آنرپیش کیاگیا اور والدہ کوشہید کی یونیفارم اوربیجز دیےگئے، اہلخانہ کا کہنا تھا کہ بیٹے کی شہادت پر فخر ہے۔
خوشاب میں چھمب سیکٹر کے شہید جوان طیب کی نمازجنازہ آبائی گاؤں میں اداکردی گئی ، جس کے بعد محمد طیب کو پورے فوجی اعزازکےساتھ سپردخاک کیاگیا، اس موقع پرسول و فوجی افسران ضلعی افسران سمیت مقامی افراد کی بڑی تعداد شریک تھیں۔
چھمب سیکٹر میں شہید ہونے والے صوبیدار محمد صادق کی نمازِ جنازہ پورے فوجی اعزاز کے ساتھ انکے آبائی علاقہ وادی نیلم جورا بانڈی میں ادا کر دی ۔ نمازِ جنازہ میں اسپیکر اسمبلی شاہ غلام قادر فوجی و سول افسران ڈپٹی کمشنر راجہ شاھد اور مقامی افراد کی بڑی تعداد نے شرکت کی ، جبکہ ان کی تدفین بھی آبائی قبرستان میں کی گئی۔
وزیراعظم عمران خان نے چھمب سیکٹر کے قریب دھماکے میں ہونے والی شہادتوں پر گہرے دکھ اور افسوس کا اظہار کیاتفصیلات کے مطابق وزیراعظم عمران خان نے چھمب سیکٹر کے قریب دھماکے کی شدید مذمت کی اور شہید جوانوں کے درجات کی بلندی کے لیے دعا کی,وزیراعظم پاکستان نے دھماکے میں زجمی ہونے والے جوانوں کی جلد صحت یابی کے لیے بھی دعا کی۔
یاد رہے کہ گزشتہ روز پاک فوج کے شعبہ تعلقات عامہ کے ادارے آئی ایس پی آر کا کہنا تھا کہ لائن آف کنٹرول پر چھمب سیکٹر کے قریب دھماکا ہوا تھا جس میں پاک فوج کے پانچ جوان شہید ہوئے۔
پاک فوج کے شعبہ تعلقات عامہ کا یہ بھی کہنا تھا کہ دھماکے سے ظاہر ہوتا ہے کہ یہ بھارتی ریاستی دہشت گردی کا نتیجہ ہے، آئی ایس پی آر نے کہا تھا کہ یہ واقعہ بھارت کی ریاستی دہشت گردی کا منہ بولتا ثبوت ہے۔