Nov 04, 2022 04:10 pm
views : 448
Location : Different cities
Lahore- CTD takes over inquiry in Imran Khan attack case
عمران
خان حملہ کیس میں اہم پیشرفت، تفتیش سی ٹی ڈی کے سپرد، ملزم لاہور منتقل ،
تحریک انصاف کا مطالبہ پورا ہونے تک ملک گیر احتجاج کا اعلان
پاکستان تحریک انصاف نے چیئرمین عمران خان کا مطالبہ پورا ہونے تک ملک گیر احتجاج جاری رکھنے کا اعلان کر دیا۔
گزشتہ
روز عمران خان پر فائرنگ کے واقعہ کے بعد اسد عمر نے بیان میں کہا تھا کہ
عمران خان نے وزیراعظم شہبازشریف، وزیرداخلہ رانا ثنا اللہ اور ایک ریاستی
ادارے کے افسر کو ذمہ دار قرار دیتے ہوئے تینوں کو عہدے سے ہٹانے کا مطالبہ
کیا ہے۔
چیئرمین پاکستان تحریک انصاف عمران خان پر حملے کی تفتیش محکمہ
انسداد دہشتگردی کے سپرد کر دی گئی جبکہ عمران خان پر ہونے والے قاتلانہ
حملے کے خلاف خیبرپختونخوا میں احتجاج کے دوران سرکاری گاڑی کو نشانہ بنانے
والے مظاہرین کے خلاف کارروائی کا فیصلہ کیا گیا ہے۔
سکیورٹی ذرائع کا
کہنا ہے کہ مرکزی ملزم نوید کو تفتیش کے لئے لاہور منتقل کردیا گیا جہاں
ملزم کو چوہنگ میں قائم سی ٹی ڈی کے سیل میں پہنچادیا گیا ہے جب کہ ملزم سے
سی ٹی ڈی سمیت دیگراداروں کی پوچھ گچھ کی جا رہی ہے۔
ذرائع کے مطابق
ملزم کے بیان کے بعد پولی گرافک ٹیسٹ کا بھی فیصلہ کیا گیا ہے جب کہ واقعہ
کا مقدمہ سی ٹی ڈی یا مقامی تھانے میں درج کیا جائے گا
پشاور پولیس نے
خیبر روڈ پر سرکاری گاڑی کو نشانہ بنانے والے مظاہرین کے خلاف کارروائی کا
فیصلہ کیا۔ جس کے لیے بی آر ٹی اسٹیشنز ، پی سی ہوٹل ، ضلعی کچہری کے
کیمروں سے سی سی ٹی وی فوٹیجز لی جائیں گیں۔
پولیس حکام نے تصدیق کی کہ
ویڈیوز میں نظر آنے والے مظاہرین جنہوں نے قانون ہاتھ میں لینے کی کوشش کی
اور سرکاری املاک کو نقصان پہنچانے کی کوشش کی ہے، ایسے مظاہرین کو شناخت
کے بعد گرفتار کیا جائے گا۔
دوسری جانب عالمی رہنماؤں سمیت کینیڈا کے
وزیراعظم جسٹن ٹروڈو اور جمائما گولڈ اسمتھ نے پاکستان تحریک انصاف چیئرمین
عمران خان پر حملے کی مذمت کی ہے۔
کینیڈین وزیراعظم نے اپنے ایک بیان میں کہا کہ عمران خان اور ان کے حامیوں پر حملہ ناقابل قبول ہے۔ اس تشدد کی شدید مذمت کرتا ہوں۔
انہوں نے مزید کہا کہ کسی جمہوریت، سیاست یا معاشرے میں تشدد کی کوئی جگہ نہیں۔
جسٹن ٹروڈو نے عمران خان اور تمام زخمیوں کی جلد صحتیابی کے لیے نیک خواہشات کا اظہار بھی کیا۔
عمران خان کی سابقہ اہلیہ جمائما نے حملے کی خبر کو خوفناک قرار دیتے ہوئے عمران خان کے محفوظ ہونے پر خدا کا شکر ادا کیا ہے۔
انہوں نے اس نوجوان کا عمران خان کے بیٹوں کی طرف سے شکریہ بھی ادا کیا جس نے مسلح شخص کے ساتھ مزاحمت کی تھی۔