بجلی سستی کریں،
ایکسپورٹ 6 ارب ڈالر تک پہنچا دیں گے، تاجروں کی وزیر اعظم کو تجویز ،
تاجروں کا کہنا تھا کہ ایکسپورٹ بڑھیں گی تو بیرونی قرض کی ضرورت نہیں پڑے
گی ، وزیر اعظم کا دورہ کراچی پورٹ پر کلیئرنس میں تاخیر پر برہمی کا اظہار
شہر قائد کی کاروباری
برادری نے وزیر اعظم شہباز شریف کو تجویز دی ہے کہ اگر وہ بجلی سستی کر دیں
تو ایکسپورٹ میں خاطر خواہ اضافہ ممکن ہے۔
تاجروں سے ملاقات میں بزنس
کمیونٹی نے وزیر اعظم کو کراچی پورٹ پر مشکلات اور شپنگ لائنز کی زیادتیوں
سے متعلق آگاہ کیا، وزیر اعظم نے پورٹ پر کلیئرنس میں تاخیر پر برہمی کا
اظہار کیا اور مسائل جلد حل کرنے کی ہدایت کی۔
تفصیلات کے مطابق وزیر
اعظم گزشتہ روز ایک روزہ دورے پر کراچی آئے تھے، انھوں نے کراچی پورٹ ٹرسٹ
کا دورہ کیا، جہاں بندرگاہوں اور نیشنل فلیگ کیریئر پاکستان نیشنل شپنگ
کارپوریشن پر وزیر اعظم کو بریفنگ دی گئی۔
تاجروں نے وزیر اعظم سے کہا
کہ اگر وہ بجلی سستی کریں تو ایکسپورٹ 6 ارب ڈالر تک پہنچا دیں گے،
ایکسپورٹ بڑھیں گی تو بیرونی قرض کی ضرورت نہیں پڑے گی۔
قبل ازیں، وزیر
اعظم شہباز شریف نے لیاری ایکسریس وے کو کارگو کے لیے چوبیس گھنٹے کھلا
رکھنے کا حکم دیا، وزیر اعظم نے کہا کراچی پورٹ ریل کے ذریعے سامان کی
ترسیل کی استعداد کو بڑھائے، پورٹ قاسم پر ایل این جی جہازوں کی فیس کو کم
کر کے اسے بین الاقومی سطح پر رائج ریٹس کے مطابق مقرر کیا جائے۔
وزیر
اعظم نے بتایا کہ دورہ قازقستان میں روسی صدر پیوٹن اور وسط ایشیائی ملکوں
کے رہنماؤں سے ملاقات ہوئی، وسط ایشیائی ریاستوں نے تجارت کے لیے ہماری
بندرگاہوں کے استعمال میں گہری دل چسپی کا اظہار کیا ہے، کراچی کی
بندرگاہوں کی ترقی سے ویلیو ایڈیشن کی صنعت سے برآمدات میں اضافہ کریں گے۔
انھوں
نے ہدایت کی کہ پورٹ قاسم اور کراچی پورٹ پر جدید مشینری کی تنصیب سے کسٹم
کلیئرنس کا وقت کم کرنے کے لیے اقدامات کیے جائیں، اور بندرگاہوں پر
اسکیننگ کی جدید مشینری کی جلد تنصیب یقینی بنائی جائے۔