کوہاٹ،اپوزیشن کو غم ہے اگرترقی جاری رہی تو ان کی سیاست ختم ہوجائے گی، وزیراعظم نوازشریف
وزیراعظم نوازشریف کا کہنا ہے کہ آج پاکستان بھر میں اقتصادی ترقی ہورہی ہے
جس کی رفتار بھی بہت تیز ہے اور اسی وجہ سے اپوزیشن کو یہ غم ہے کہ
اگرترقی جاری رہی تو ان کی سیاست ختم ہوجائے گی۔
کوہاٹ میں جلسہ عام سے خطاب کرتے ہوئے وزیراعظم نواز شریف کا کہنا تھا کہ
آج پاکستان بھر میں اقتصادی ترقی ہورہی ہے اور ترقی کی رفتار بھی بہت تیز
ہے جب کہ آئی ایم ایف اور ورلڈ بینک سمیت اے ڈی بی سربراہان پاکستان کی
ترقی کے معترف ہیں لہذا اسی وجہ سے اپوزیشن کو یہ غم ہے کہ اگرترقی جاری
رہی تو ان کی سیاست ختم ہوجائے گی۔
وزیراعظم نوازشریف کا کہنا تھا کہ سی پیک بنائیں گے اور لوڈشیڈنگ ختم کریں
گے، 2018میں بجلی کی لوڈشیڈنگ ختم ہوجائے گی جب کہ 2013 میں دہشت گردی ملک
بھر میں پھیلی ہوئی تھی لیکن آج دہشت گردی کی کمر ٹوٹ چکی ہے۔
وزیراعظم نوازشریف نے کہا کہ کوہاٹ کے لوگوں کا جذبہ اور کارکنوں کی بڑی
تعداد دیکھ کر دل باغ باغ ہوگیا، میں نے سوچاکہ کوہاٹ والوں کے لیے تحفہ
لیکر جاؤں اور یہ تحفہ کوہاٹ کے لوگوں پر کوئی احسان نہیں ہے، یہاں جو ترقی
ہورہی ہے وہ آپ لوگ مجھ سے بہتر جانتے ہیں جب کہ میں سمجھتا ہوں کہ کے پی
کے کو تبدیل ہونا چاہئے اور وہ تبدیلی ہم لیکر آئیں گے۔
وزیراعظم نوازشریف کا کہنا تھا کہ کوہاٹ میں گیس منصوبہ شروع ہورہا ہے جس
پر تقریباً 3.9ارب روپے لاگت آئی گی، آج سے پہلے کسی نے کبھی بھی کوہاٹ کو
گیس دینے کی بات نہیں کی لیکن یہ چار سو کروڑ کوہاٹ کی ماؤں ، بہنوں بزرگوں
پر قربان ہیں۔
وزیراعظم نوازشریف نے کوہاٹ میں اسٹیٹ آف دی آرٹ اسپتال اور خواتین کے لیے
یونیورسٹی کے کیمپس بنانے سمیت ریل کارسروس شروع کرنے کااعلان کرتے ہوئے
کہا کہ غریبوں کے لیے مفت علاج کامنصوبہ لارہے ہیں اور اب کسی کو بھی علاج
کے لیے اپنی جائیداد نہیں بیچناپڑے گی۔
وزیراعظم نوازشریف کا کہنا تھا کہ کوہاٹ کو موٹر وے سے ملایا جائے گا اور
ہائی وے بننے سے پشاور اور اسلام آباد کا راستہ کم ہو جائیگا۔