Nov 03, 2016 03:20 pm
views : 995
Location : Supreme Court of Pakistan
Islamabad- Chairman PTI Imran Khan Media Talk
اسلام آباد ، پاناما لیکس پر حکومت دستاویزات میں گڑبڑ کر رہی ہے، عمران خان
چیئر مین پاکستان تحریک انصاف عمران خان کا کہنا ہے کہ حکومت دستاویزات میں
گڑبڑ کر رہی ہے، نیب اورایف آئی اے نے جعلی دستاویزات جمع کروائی ہیں۔
سپریم کورٹ کے باہر میڈیا سے بات کرتے ہوئے چیئر مین پاکستان تحریک انصاف
عمران خان نے کہا کہ انہیں عدالت کی کارروائی سے خوشی ہوئی ہے، انہیں پتہ
نہیں تھا کہ سپریم کورٹ میں ایسا ہو جائے گا، 7 ماہ سے پاناما لیکس کی
باتیں ہورہی ہیں لیکن سپریم کورٹ کے حکم کے بعد بھی نواز شریف کے بچوں کے
جواب دائر ہی نہیں کرائے گئے۔ نواز شریف نے پارلیمنٹ میں کہا تھا کہ وہ
احتساب کے لیے تیار ہیں تو پھر اب تک جواب دائر کیوں نہیں کرائے گئے۔ نواز
شریف کے درباریوں نے کہا تھا کہ وہ اس معاملے میں عدالتی کارروائی پر سوال
نہیں اٹھائیں گے لیکن آج اٹارنی جنرل نے دائرہ کار پر اعتراض کیا جسے عدالت
نے مسترد کردیا۔
چیئر مین پاکستان تحریک انصاف عمران خان نے کہا کہ پاناما لیکس کا معاملہ
ایک خاندان کی کرپشن کا کیس ہے، اٹارنی جنرل پاکستان کے ملازم ہیں کسی
خاندان کے نہیں، اٹارنی جنرل قوم کے پیسوں سے تنخواہ لیتا ہے تو پھر وہ
کیوں ایک خاندان کا مقدمہ لڑ رہے ہیں۔ ہم اٹارنی جنرل پر اعتراض اٹھائیں
گے۔ انہوں نے مز ید کہا کہ حکومت دستاویزات میں گڑبڑ کر رہی ہے، نیب اورایف
آئی اے نے جعلی دستاویزات جمع کروائی ہیں۔ ہم نے نہیں حکومت نے قوم کو
پریشان کیا ہے۔ کیس چلے گا تو معلوم ہوگا کہ ہم انتشار پھیلا رہے تھے یا
نہیں۔