Nov 17, 2016 05:37 pm
views : 949
Location : Supreme Court of Pakistan
Islamabad- Federal Minister Railway Khawaja Saad Rafique Media Talk
اسلام آباد ، سیاست عمران خان کے بس کا روگ نہیں وہ کرکٹ کی کوچنگ کریں، سعد رفیق
اسلام آباد میں سپر یم کورٹ کے باہر میڈیا سے بات کرتے ہوئے وفاقی وزیر سعد
رفیق کا کہنا تھا کہ پاکستان کے دیرینہ دوست ملک ترکی کے منتخب صدر رجب
طیب اردگان ہمارے ملک میں موجود ہیں اور پارلیمنٹ کا مشترکہ اجلاس بھی ہے
لیکن پی ٹی آئی نے مشترکہ اجلاس کا بائیکاٹ کرکے دنیا کو غلط پیغام دیا،
عمران خان اور ان کی جماعت کی قومی ذمہ داری تھی کہ وہ برادر ملک ترکی کے
سامنے تقسیم کا پیغام نہ بھیجتے لیکن انہوں نے یہ اقدام اٹھا کر ثابت کردیا
کہ سیاست عمران خان کے بس کا روگ نہیں وہ جاکر کرکٹ کی کوچنگ کریں تو
بہترہوگا۔
وفاقی وزیر ریلوے خواجہ سعد رفیق نے کہا کہ عمران خان کا یہ تاثرغلط ہے کہ
جوائنٹ سیشن سے نواز شریف کو کوئی فائدہ ہوگا مشترکہ اجلاس سے صرف پاکستان
مضبوط ہوگا۔ پی ٹی آئی جواب دے کہ وہ مشترکہ اجلاس کا بائیکاٹ کرکے کس کا
دل ٹھنڈا کررہی ہے اور ان کے سربراہ کس کے لئے کام کرر ہے ہیں۔
وفاقی وزیر ریلوے خواجہ سعد رفیق کا کہنا تھا کہ پارلیمنٹ کسی ایک فرد کی
نہیں بلکہ پوری قوم کی ہے اسی میں تحریک انصاف کی 34 سیٹیں ہیں، عمران خان
کی جانب سے کبھی پارلیمنٹ کو جعلی کہا جاتا ہے اور کبھی اس پارلیمنٹ میں
جاکر بیٹھ جاتے ہیں، اس پارلیمنٹ کی تنخواہیں بھی لیتے ہیں اور اعزازیئے
میں بھی شریک ہوتے ہیں لیکن پھر اس کی کارروائی میں بھی شریک نہیں ہوتے۔
عمران خان بتائیں کہ وہ پاکستانیوں کیلئے کام کررہے ہیں یا لندن میں مقیم
اپنے یہودی رشتہ داروں کے لئے اور کس لابی کو خوش کیا جارہا ہے۔
وفاقی وزیر ریلوے خواجہ سعد رفیق نے کہا کہ کچھ عرصہ قبل بھی کشمیریوں کے
ساتھ اظہار یکجہتی کا جوائنٹ سیشن ہوا جس میں عمران خان نے آنے سے انکار
کردیا، اس وقت پورے بھارتی میڈیا نے دنیا بھر میں ہماری تضحیک کی اور کہا
کہ پاکستانی تو خود ہی کشمیر کے مسئلے پر یکجا نہیں، عمران خان بتائیں کہ
کشمیر سے کس کا ذاتی تعلق یا مفاد پنہاں ہے اور کشمیر کے مسئلے پر کون سی
ذاتی رنجش ہے۔ کشمیر کے مسئلے پر پوری قوم ایک جانب اور عمران خان ایک طرف
کھڑے ہیں۔