لاہور،عید کے موقع پر حکومت کا عوا م کو تحفہ، پیٹرول کی قیمت میں دو روپے اضافہ
وزارت خزانہ نے پیٹرولیم مصنوعات کی قیمتوں کے حوالے سے آئل اینڈ گیس
ریگولیٹری اتھارٹی (اوگرا) کی سفارشات کو مسترد کرتے ہوئے صرف پیٹرول کی
قیمت میں 2 روپے فی لیٹر اضافہ کردیا، ہائی اسپیڈ ڈیزل ،لائٹ ڈیزل اور مٹی
کے تیل کی قیمتیں پرانی سطح پر برقراررہیں گی۔وزارتِ خزانہ کی جانب سے جاری
کیے گئے اعلامیے کے مطابق ملک میں پیٹرول کو 2 روپے سے مہنگا کردیا
گیاتاہم وزیر اعظم شاہد خاقان عباسی کی خصوصی ہدایت پر ہائی اسپیڈ ڈیزل،
لائٹ ڈیزل اور مٹی کے تیل کی قیمتیں برقرار رکھی جائیں گی۔
مذکورہ اضافے کے ساتھ پیٹرول کی قیمت 71 روپے 50 پیسے فی لیٹر ہوجائے
گی۔وزارت خزانہ کے مطابق اوگرا نے پیٹرول کی قیمت میں 2 روپے 35 پیسے فی
لیٹر، ہائی اسپیڈ ڈیزل کی قیمت میں 75 پیسے فی لیٹر، لائٹ ڈیزل کی قیمت میں
12 روپے 18 پیسے فی لیٹر جبکہ مٹی کے تیل کی قیمت میں 15روپے 79 پیسے فی
لیٹر اضافے کی سفارش کی تھی تاہم حکومت نے اوگرا کی سفارشات کو مسترد کرتے
ہوئے صرف پیٹرول کی قیمت میں 2 روپے فی لیٹر اضافہ کرنے کا فیصلہ کیا جبکہ
باقی تمام مصنوعات کی قیمتوں کو آئندہ ماہ کیلئے برقرار رکھنے کا فیصلہ
کیا۔
پیٹرولیم مصنوعات کی نئی قیمت کا اطلاق رات 12 بجے سے ہوگیاہے،خیال رہے کہ
وزارت خزانہ نے گذشتہ ماہ اگست کے مہینے میں پیٹرولیم مصنوعات کی قیمتوں
میں اضافہ نہ کرنے کا فیصلہ کرتے ہوئے پیٹرول کی قمیت میں 1 روپے 80 پسے
اور لائٹ ڈیزل کی قیمت میں 2 روپے 50 پیسے فی لیٹر کم کرنے کا اعلان کیا
تھا۔