Apr 04, 2018 11:00 pm
views : 550
Location : Different Areas
Karachi- Demand of Drinks, Increases as Summer Starts
کراچی،گرمی کی شدت کے باعث مشروبات کی مانگ میں اضافہ
کراچی کے موسم نے انگڑائی کیا لی شہر کے باسیوں کو ٹھنڈے ٹھنڈے مشروبات کی
یاد آگئی ۔گرمی کی شدت کو کم کرنے کے لیئے شہریوں نے مشروبات کے ٹھیلوں کا
رخ کرلیا ۔گنے کے رس اور ستو کی مانگ میں اضافہ ہوگیا۔
شہر قائد میں سورج نے قہر برسایا تو گرمی کے ستائے شہریوں کو ٹھنڈے ٹھنڈے
مشروبات کی یاد آگئی ۔ایک طرف غیر اعلانیہ لوڈشیڈنگ تو دوسری جانب بدلتے
موسم نے شہرکے باسیوں کو بے حال کردیا ۔سخت گرمی کی شدت سے بچنے اور پیاس
بجھانے کے لیئے شہریوں نے گنے کے رس ،ستو اور دیگرمشروبات کے ٹھیلوں کا رخ
کرلیا۔گرمی آتے ہی گنے کے رس اور ستو کی مانگ میں اضافہ ہوگیا ۔ٹھنڈا ٹھار
اور میٹھا میٹھا گنے کا رس شہریوں کے لیئے راحت و تسکین کا باعث ہے ۔گرمی
میں گنے کا رس پی کر شہری نہ صرف مزے لے رہے ہیں بلکہ بھرپور لطف اندوز
ہورہے ہیں ۔
ایک شخص وقاص نے ذرائع ابلاغ عامہ کے نمائندے سے بات کرتے ہوئے کہا کہ گرمی
میں گنے کا رس جسم کو راحت بخشتا ہے گنے کا رس پی کر گرمی کا احساس کم
ہوجاتا ہے ۔
ایک اور شخص ہاشم امالہ کا کہنا تھا کہ کراچی میں بڑھتی گرمی کے باعث گنے
کے رس کا استعمال کرتے ہیں ۔موسم تبدیل ہوتے ہی مشروبات کے ٹھیلے تو سج
جاتے ہیں ساتھ ہی ساتھ ان کی مانگ بھی بڑھ جاتی ہے ۔گرمی سے بچنے کے لیئے
زیادہ سے زیادہ مشروبات کا استعمال تو کریں ساتھ ہی احتیاطی تدابیر کا بھی
خاص خیال رکھیں ۔
بلوچستان سے آئے ہوئے ایک شخص محمد حسین نے کہا کہ کراچی میں بجلی کی آنکھ
مچولی نے تو پریشان کیا ہی ساتھ ہی موسم نے بھی پسینے نکال دیئے پیاس
بجھانے اور گرمی سے بچنے کے لیئے مشروبات کا استعمال کرتے ہیں ۔
ستو کے مزے لیتے ایک شخص ارشاد کا کہنا تھا کہ کراچی کی گرمی کا مقابلہ
کرنے کے لیئے ستو کا استعمال کرتے ہیں ستو کا شربت پی کر چست وتوانا ہو
جاتے ہیں ۔ستو کا شربت نہ صرف گرمی کو کم کرتا ہے بلکہ صحت کے لیئے بھی بہت
اچھا ثابت ہوتا ہے ۔