کراچی، شہر قائد میں بچوں کے اغوا میں اضافہ، شہریوں میں خوف پھیل گیا
عروس البلاد شہر قائد میں بچوں کے اغواء کے واقعات میں اضافے کے بعد والدین
میں سخت خوف وہراس پھیل گیاہے۔ کراچی شہر کے مختلف علاقوں میں آئے روز
بچوں کے پے در پے اغواء کے واقعات ہورہے ہیں جس کی وجہ سے والدین اپنے لخت
جگروں کو خوف کے عالم میں اسکول بھی نہیں بھیج رہے۔ گزشتہ روز لیاری کے
علاقے میں ایک برقع پوش آدمی کی جانب سے بچے کو اغواء کرنے کی کوشش کی گئی
تاہم علاقہ مکینوں نے اغواء کار کو دھرکر اس کی درگت بنادی، اغواء کار کو
علاقہ مکینوں نے پولیس کے حوالے کردیا۔
اسی طرح لیاقت آباد کے علاقے بی ایریا میں کچرا اٹھانے والے پٹھان کی جانب
سے بچی کو اغواء کرنے کی کوشش کی گئی، بچی کو بورے میں ڈال کر پٹھان بھاگ
ہی رہا تھا کہ اسی اثناء میں بچی کی آوازیں سن کر اہل محلہ نے پٹھان کو پکڑ
لیا اور مار پیٹ کر پولیس کے حوالے کردیا۔
اس حوالے سے ایک شہری عبدالقیوم کا کہنا تھا کہ بچے کے اغواء کے معاملے پر
ماں باپ کو احتیاط کرنی چاہیے، والدین بچوں کو کبھی بھی اکیلا نہیں چھوڑیں،
اسکول بھی اپنے ساتھ لے کر جائیں اور اگر وین وغیرہ بھی لگائی ہوئی ہے تو
وین والے کو تاکید کریں کہ جب تک بچہ اسکول میں داخل نہ ہوجائے تب تک وہاں
پر موجود رہے۔
ایک نوجوان محمد معاذ علی کا کہنا تھا کہ اس خوبصورت شہر میں بچے اغواء
ہورہے ہیں جو کہ ناگوار عمل ہے۔ بچوں کو تحفظ فراہم کیا جانا چاہیے، وزیر
اعظم نے تبدیلی کا نعرہ لگایا تھا، سب سے پہلے پولیس کے قانون میں تبدیلی
لانی چاہیے، پولیس ٹھیک ہوگئی تو بچو ں کے اغواء کے واقعات میں بھی کمی
آجائے گی، جتنے بچے اغواء ہوئے ہیں ان کے والدین پر کیا گزری ہوگی ہم بیان
نہیں کرسکتے۔