اسلام آباد، سپریم کورٹ نے آرمی پبلک اسکول پشاور حملہ کیس کی تحقیقات کیلئے کمیشن قائم کردیا
سپریم کورٹ نے آرمی پبلک اسکول پشاور حملہ کیس کی تحقیقات کیلئے کمیشن قائم کردیا۔چیف جسٹس آف پاکستان جسٹس میاں ثاقب نثار کی سربراہی میں 3 رکنی بینچ نے اے پی ایس حملے پر ازخود نوٹس کی سماعت کی۔
سپریم کورٹ نے واقعے کی تحقیقات کیلئے کمیشن قائم کردیا جو 6 ہفتوں میں اپنی رپورٹ عدالت میں جمع کرائے گا جبکہ کمیشن ہائیکورٹ کے سینئر جج کی سربراہی میں کام کرے گا۔
چیف جسٹس نے حکم دیا کہ سانحے کی تحقیقات کے علاوہ لواحقین کے خدشات اور ان کی داد رسی بھی کی جائے۔
کمرہ عدالت میں موجودہ شہید بچوں کی ماؤں سے مکالمے کے دوران چیف جسٹس نے کہا اپنی بہنوں سے معافی چاہتا ہوں، زبانی حکم تو پہلے دیا تھا لیکن فائل پر آرڈر نہیں کر سکا، پشاور سماعت کے موقع پر بینچ ٹوٹ جانے سے ایسی صورتحال پیدا ہوئی۔
چیف جسٹس نے کہا ہم آپ کے دکھ میں برابر کے شریک ہیں اور انصاف کے تقاضے پوری کیے جائیں گے۔
یاد رہے کہ 16 دسمبر 2014 کو پشاور کے آرمی پبلک اسکول پر دہشت گردوں نے حملہ کرکے 150 سے زائد افراد کو موت کے گھاٹ اتار دیا تھا، جن میں زیادہ تعداد معصوم بچوں کی تھی۔