اسلام آباد، بیورو کریسی کے پاس کارکردگی دکھانے کا بہترین موقع ہے، عمران خان
وزیر اعظم عمران خان کا کہنا ہے کہ اداروں میں میرٹ اور شفافیت لانا حکومت
کی ترجیح ہے، بیورو کریسی کے پاس کارکردگی دکھانے کا بہترین موقع ہے۔ حکومت
کی پالیسی اداروں کو غیر سیاسی کرنا ہے، بیورو کریسی ریڑھ کی ہڈی کی حیثیت
رکھتی ہے۔
وزیر اعظم نے 109 ویں مینجمنٹ کورس کے شرکاء سے ملاقات کے دوران مزید کہا
کہ بیورو کریسی پر انتظامی امور کی بڑی ذمہ داریاں ہیں، قوم کی توقعات پر
پورا اترنا بیورو کریسی کیلئے بڑا چیلنج ہے، دستیاب وسائل کے استعمال کیلئے
بہترین مینجمنٹ ضروری ہے، حکومت اداروں میں اصلاحات اور استحکام کیلئے
اقدامات کررہی ہے، تعلیم، صحت اور حکومتی امور میں بہتری کیلئے کوشاں ہیں،
کرپشن پر قابو پانا حکومت کی ترجیحات میں شامل ہے۔ حکومتی پالیسیوں سے
بیورو کریسی کی صلاحیت اور استعداد کار میں اضافہ ہوگا۔
وزیراعظم عمران خان کامزید کہنا تھا کہ بھارت کو جذبہ خیرسگالی کے تحت
مذاکرات کی دعوت دی، بھارت نے پاکستان کی دعوت کا مایوس کن جواب دیا،
بھارتی قیادت خطے کو درپیش بڑے چیلنج سے نمٹنے میں ناکام ہے، برصغیر کی
عوام کا سب سے بڑا مسئلہ غربت ہے۔