Nov 09, 2019 09:04 pm
views : 245
Location : Domestic place
Islamabad- Fake assemblies make legislation controversial: fazl ur rehman
اسلام آباد،حکومتی وزرا کا لب ولہجہ مفاہمتی نہیں بلکہ تصادم کی طرف جاتا ہے،مولانا فضل الرحمان
جمعیت علماء اسلام (ف) کے سربراہ مولانا فضل الرحمان کا کہنا ہے کہ حکومتی مذاکراتی کمیٹی میں ہمارے موقف کو سمجھنے کی صلاحیت نہیں ہے، حکومتی مذاکراتی کمیٹی نا ہی ہماری بات وزیراعظم تک پہنچاتی ہے، حکومتی وزرا کا لب ولہجہ مفاہمتی نہیں بلکہ تصادم کی طرف جاتا ہے۔
آزادی مارچ کے دھرنے سے خطاب کرتے ہوئے مولانا فضل الرحمان نے کہا کہ جب سے اسمبلیاں بنی ہیں قانون سازی نہیں ہوئی، ان کا بنایا ہوا صدر آرڈینینس جاری کرتا ہے اور 15، 20 آرڈیننس عجلت میں پاس کرائے جاتے ہیں۔
انہوں نے کہا کہ جعلی نمائندوں کے آرڈیننس بھی جعلی ہوتے ہیں، ان کی کوئی حیثیت نہیں ہے، ایڈہاک پر حکومتیں نہیں چلا کرتیں، ان کو فارغ کرو اور پاکستان کی جان چھوڑو۔
انہوں نے کہا کہ اگر ہم اسلام کے نام پر بندوق اٹھانے کے خلاف ہیں تو عمران قبضہ گروپ ہے، ان کو بھی تسلیم نہیں کریں گے۔
امیر جے یو آئی نے کہا کہ ملک تقریر سے نہیں چلتا، مشہور کیا گیا کہ تقریر اچھی کی، لیکن اگلے روز ہی ووٹنگ میں واضح ہوا، جو مستقل ووٹ دینے والے ممالک تھے وہ بھی حاصل نہیں کرسکے۔
انہوں نے مزید کہا کہ تمہاری سفارتکاری پر سوال اٹھا ہے کہ امریکا کے دورے پر جاتے ہو تو اسکول کا استاد بھی استقبال نہیں کرتا جبکہ مودی کو اچھا پروٹوکول مل رہا ہے، تم نے ملک کو دنیا میں تنہا کردیا۔
مولانا فضل الرحمان نے کہا کہ ہمارے مارچ میں تمام سیاسی جماعتیں ایک پلیٹ فارم پر ہیں، یہاں ہر پارٹی کی نمائندگی روز موجود ہوتی ہے اور سب اپنا موقف دیتے ہیں، ہم سب منظم ہیں اور اپنے موقف پر قائم ہیں، آخری دن تک باطل کے خلاف ڈٹے رہیں گے۔
انہوں نے کہا کہ میں ان تمام سیاسی جماعتوں کا مشکور ہوں جو ہمارے دھرنے میں موجود ہیں۔