اسلام آباد،آصف زرداری بغیر کسی جرم کے جیل میں، نواز شریف مجرم ہوکر بھی ملک سے باہر ہیں،بلاول
چیئرمین پیپلزپارٹی بلاول بھٹو نے کہا ہے کہ آصف زرداری بغیر کسی جرم کے جیل میں ہیں اور نواز شریف مجرم ہوکر بھی ملک سے باہر ہیں۔
تفصیلات کے مطابق چیئرمین پیپلزپارٹی بلاول بھٹو نے پمز اسپتال کے باہر میڈیا سے گفتگو کرتے ہوئے کہا کہ میڈیکل بورڈ نے آصف زرداری کا چیک اپ کیا ہے، ابھی رپورٹ نہیں آئی ہے، آصف زرداری کا علاج ہم کراچی کے اسپتال میں کرائیں گے۔
بلاول بھٹو نے کہا کہ جس خاندان نے ملک کو لوٹا ہے اس کو حساب دینا ہوگا، ہم اداروں اور الیکشن کمیشن کو مضبوط بنانا چاہتے ہیں۔
انہوں نے کہا کہ مسائل حل ہوں تو جمہوری سسٹم میں یقین بڑھتا رہے گا، حکمران جھوٹ بولنا بند کریں اور عوام کے مسائل حل کرنا شروع کریں، عوامی جمہوری حکومت بنانے کے لیے جدوجہد جاری رکھیں گے۔
ایک سوال کے جواب میں چیئرمین پیپلزپارٹی نے کہا کہ آصف زرداری کو وہ سہولیات دی جائیں جو ہر شہری کا حق ہے، مخالفین کو دباؤ میں رکھنے کے لیے حکومت حربے استعمال کرتی ہے۔
بلاول بھٹو نے کہا کہ بینظیر بھٹو کی برسی لیاقت باغ راولپنڈی میں منائی جائے گی، حکومت عوام کے مسائل حل کرے پاکستان کے عوام اپنے مسائل کا حل دیکھنا چاہتے ہیں۔
واضح رہے چند روز قبل بلاول بھٹو کا کہنا تھا کہ ایسے ماحول میں کوئی حکومت ہے تو وہ سندھ کی ہے جو کام کر رہی ہے، صوبہ سندھ کو بہت سے مسائل کا سامنا ہے۔ سندھ کے عوام مہنگائی کے سونامی میں ڈوب رہے ہیں۔ نوجوان ایک کروڑ نوکریوں کی تلاش میں ہیں، روزگار نہیں مل رہا۔