انصاف کی فراہمی ریاست کی ذمہ داری ہے، وزیر داخلہ بلوچستان
صوبائی وزیر داخلہ میر ضیاء اللہ لانگو نے کہا ہے کہ انصاف کی فراہمی ریاست کی ذمہ داری ہے۔
تفصیلات کے مطابق صوبائی وزیر داخلہ میر ضیاء اللہ لانگو نے کوئٹہ میں پریس کانفرنس کرتے ہوئے کہا کہ ہوشاپ میں دل خراش واقعہ پیش آیا ہم لواحقین کے غم میں برابر کے شریک ہیں، تمام ہمدردیاں لواحقین کے ساتھ ہیں، ہوشاپ واقعے کی جتنی مذمت کی جائے کم ہے، پہلے دن ہی تمام اداروں کے حکام کو ہدایت کی تھی کہ لواحقین کے ساتھ تعاون کیا جائے، انصاف کی فراہمی ریاست کی ذمہ داری ہے۔
صوبائی وزیر داخلہ میر ضیاء اللہ لانگو کا کہنا تھا کہ ریاست اپنے لوگوں کو تنہا نہیں چھوڑے گی، ہم اپنے لوگوں کے ساتھ کھڑے ہیں، حیات بلوچ کیساتھ ظلم ہوا، سانحہ ڈنک کے حوالے سے بھی ریاست نے اپنی ذمہ داریاں پوری کیں، عوام لاشوں پر سیاست سے دور رہیں۔
انہوں نے کہا کہ معصوم بچوں کی لاشوں پر سیاست کی جارہی ہے، دھرنے کے شرکاء کے جائز مطالبات کو تسلیم کرلیا گیا ہے، پوسٹ مارٹم کے حوالے سے تعاون نہیں کیا جارہا، سیاسی جماعتوں کے ذاتی مفادات کو ریاست تسلیم نہیں کرے گی، لواحقین سے اپیل کرتا ہوں کہ شہداء کو دفنائیں۔
صوبائی وزیر داخلہ میر ضیاء اللہ لانگو کا کہنا تھا کہ بلوچستان میں امن و امان آئیڈیل نہیں، گزشتہ 20 سالوں سے بد امنی کے واقعات میں کمی آئی ہے۔