وفاقی
وزیر اطلاعات و نشریات نے اپوزیشن پر تنقید کرتے ہوئے کہا ہے اگلے انتخابات
میں یہ قیادت دستیاب نہیں ہوگی اور اگر ہمارا نظام بھی سعودی عرب کی طرح
ہوتا تو اب تک اربوں وصول ہوجاتے۔
وفاقی وزیر اطلاعات و نشریات نے اپوزیشن پر تنقید کرتے ہوئے کہا ہے اگلے انتخابات میں یہ قیادت دستیاب نہیں ہوگی اور اگر ہمارا نظام بھی سعودی عرب کی طرح ہوتا تو اب تک اربوں وصول ہوجاتے۔
لاہور میں وفاقی وزیر تعلیم شفقت محمود کے ہمراہ پریس کانفرنس کے دوران مری میں پیش آنے والے واقعے پر بات کرتے ہوئے وفاقی وزیر اطلاعات و نشریات فواد چوہدری نے کہا کہ مری کی انتظامیہ اور حکومت پنجاب ایک ہفتے سے کہہ رہی تھی بہت زیادہ لوگ آرہے ہیں لہٰذا سفری کیلنڈر پر نظر ثانی کریں۔
ان کا کہنا تھا کہ فوج کو بلالیا گیا ہے، فوج کے 5 پلٹن وہاں کام کر رہی ہے، ایف ڈبلیو او نے ساری مشینری وہاں پہنچائی ہے، ایکسپریس وے خالی کردیا گیا ہے، نتھیاگلی میں خیبرپختونخوا حکومت نے بھی راستے کھول دیے ہیں۔
فواد چوہدری نے کہا کہ تمام بالائی علاقوں میں بہت زیادہ رش ہے اور وہاں جگہ نہیں ہے، جب لاکھوں لوگ اس طرح اچانک پہنچ جائیں گے تو نظام بیٹھ جاتا ہے اس لیے سیاح وہاں نہ جائیں۔
انہوں نے کہا کہ بدقسمتی کی بات ہے کہ اپوزیشن کی جانب سے آج بھی سیاست کی جارہی ہے، شاہد خاقان عباسی کو حلقے میں موجود ہونے کے بجائے راولپنڈی میں بیٹھ کر پریس کانفرنس کر رہے ہیں، اسی طرح مریم نواز بھی سیاست کر رہی ہیں۔
ایک سوال پر ان کا کہنا تھا کہ شہباز شریف سے کہیں گے ابھی صبر کریں اور آئین قانون کا تقاضا یہی ہے کہ غلط حلف نامہ دینے پر آپ جیل جائیں گے اور اگلے ہفتے لاہور ہائی کورٹ میں وفاقی حکومت کی طرف سے کیس داخل ہوگا۔
فواد چوہدری نے کہا کہ شہباز شریف اپنی سیٹ کی فکر کریں، وزیراعظم تو بھول جائیں اگلی دفعہ ایم این اے بھی نہیں بن سکیں گے کیونکہ اس کیس میں 5 سال کی نااہلی ہے۔
احتساب کے حوالے سے ان کا کہنا تھا کہ نواز شریف اور مریم نواز کو سزا ہو چکی ہے، شہباز شریف اور حمزہ شہباز کے کیسز عدالت میں ہیں، اگلے 6 سے 8 مہینوں میں بڑی مچھلیاں اس تالاب سے باہر ہوجائیں گی۔
وزیر اطلاعات کا کہنا تھا کہ اگلے انتخابات کے لیے یہ قیادت دستیاب نہیں ہوگی، آصف زرداری کا اومنی اکاؤنٹس والے کیس میں 12 ارب سے زیادہ وصولی ہوئی ہے تاہم وزیراعظم، ہماری جماعت اور دیگر لوگوں کی طرف یہ بات آرہی ہے کہ زیادہ تیز ہونا چاہیے تھا۔
شفقت محمود نے تعلیم کے حوالے سے کہا کہ ہم نے جب سے کورونا کی وبا پھیلی ہے تعلیم کے وزرا کی بین الصوبائی کانفرنس کے تحت کی ہے اور اب بھی مل کر فیصلے کریں گے۔
ان کا کہنا تھا کہ ہر صوبے کے حالات مختلف ہیں لیکن عمومی طور پر حالات زیادہ خراب نہ ہوئے تو تعلیمی ادارے جتنا ممکن ہو کھلے رہیں، اگر حالات زیادہ خراب ہوئے پھر بند کرنا پڑے گا۔
یکساں نصاب تعلیم کے حوالے سے ان کا کہنا تھا کہ ہم نے کسی کو نہیں روکا کہ وہ اپنی زبان میں تعلیم نہ دیں، ہم نے صوبوں کو کہا ہے یکساں نصاب تعلیم کا مواد یکساں ہوگا لیکن اپنی صوبائی زبانوں میں پڑھانا چاہتے ہیں پڑھائیں کوئی مسئلہ نہیں ہے۔