Feb 24, 2017 06:03 pm
views : 790
Location : 90 Shahrah-E-Quaid-E-Azam
Lahore- Law Minister Punjab Rana Sanaullah Press Conference
لاہور، گزشتہ روز ڈیفنس کا واقعہ محض ایک حادثہ تھا اس کا دہشت گردی سے کوئی تعلق نہیں ، رانا ثنا اللہ
وزیرقانون پنجاب رانا ثنا اللہ نے کہا ہے کہ گزشتہ روز ڈیفنس کا واقعہ
محض ایک حادثہ تھا اس کا دہشت گردی سے کوئی تعلق نہیں،حادثے کی جگہ سے
دھماکہ خیر مواد یا دہشت گردی میں استعمال ہونے والےمواد کے کوئی شواہد
نہیں ملے ۔
لاہور میں90شاہراہ میں پریس کانفرنس سے خطاب کرتے ہوئے وزیرقانون پنجاب
رانا ثنااللہ کا کہنا تھا کہ گزشتہ روز ڈیفنس میں ہونے والے دھماکے کے
حوالے سے متضا د خبریں گردش کرتی رہیں اور میڈیا پر یہ بھی کہا گیا کہ
لاہور دھماکوں سے گونج اٹھا اور عوام میں شدید خوف و ہراس پھیلایا گیا جب
کہ دھماکے کے حوالے سے اطلاع یہ تھی کہ دھماکا سلینڈر یا جنریٹر پھٹنے کا
تھا۔
وزیرقانون پنجاب رانا ثنا اللہ نے کہا کہ لاہور دھماکے سے متعلق ابتدائی
اطلاعات تھیں کہ جنریٹر کا دھماکا ہوا ہے،کسی کا خیال تھا کہ یہ سلنڈر
دھماکا ہے۔قانون نافذ کرنے والے ادارے فوری طور پر دھماکے کی جگہ پہنچے۔
وزیرقانون پنجاب رانا ثنا اللہ نے کہا کہ فرانزک ٹیم نے جائے وقوعہ سے
اہم سیمپل لینے ہوتے ہیں جس کے باعث تاخیر ہوئی، فرانزک لیبارٹری نے جائے
وقوعہ سے 6 سیمپل لئے جس کی رپورٹ بھی آچکی ہے اور رپورٹ میں یہ بات ثابت
ہوگئی ہے کہ ڈیفنس دھماکا دہشت گردی نہیں بلکہ گیس کی لیکج اورسلنڈرز کے
باعث ہوا اور یہ ایک حادثہ تھا۔
وزیرقانون پنجاب رانا ثنا اللہ کا کہنا تھا کہ دھماکے میں 7 افراد جاں
بحق اور 35 زخمی ہوئے تمام ایجنسیز ڈی ایچ اے دھماکے کی تحقیقات کررہی ہیں
جب کہ حادثے کی رپورٹ بھی درج کرلی گئی ہے، جس کی روشنی میں ناقص گیس سلنڈر
فروخت کرنے والوں کے خلاف سخت کارروائی کی جائے گی۔
وزیرقانون پنجاب رانا ثنا اللہ نےلاہورچیئرنگ کراس دھماکے کے حوالے سے
بتایا کہ دھماکہ کرنے والا پورا نیٹ ورک ٹریس ہوگیا۔تمام کردارقانون کی
گرفت میں ہیں۔مقامی سطح پر کوئی سہولت کار شامل نہیں ۔گرفتاردہشتگردوں سے
حاصل اطلاعات کی روشنی میں ایکشن پلان بنارہےہیں۔دہشتگردوں سےملنے والی
اطلاعات میڈیا سےشیئر نہیں کرسکتے۔
وزیرقانون پنجاب رانا ثنا اللہ کا مزید کہنا تھا کہ دہشت گردی کے خلاف
ہماری قومی جنگ ہے اس کے خلاف ہمیں مل کر لڑنا ہوگا اس جنگ میں میڈیا،
سیاستدانوں، سکیورٹی اداروں کے اہلکاروں اورعوام نے بے شمارقربانیاں دیں
اور اب بھی قانون نافذ کرنے والےادارے اورعوام دہشت گردی کے خلاف اپنا
کردار ادا کر رہے ہیں، دہشت گردوں کو منطقی انجام تک پہنچا کر ہی دم لیں
گے۔