راولپنڈی ، آرمی چیف جنرل قمر جاوید باجوہ کامنگلا کے قریب پبی میں نیشنل کاؤنٹر ٹیررازم سینٹرکا دورہ ،آئی ایس پی آر
آرمی چیف جنرل قمر جاوید باجوہ کا کہنا ہے کہ ہم نے امن و استحکام کے لیے
اہم کردار ادا کیا اور دنیا اس حوالے سے ہماری کوششوں کو تسلیم کرتی ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر
جاوید باوجوہ نے منگلا کے قریب پبی میں نیشنل کاؤنٹر ٹیررازم سینٹرکا دورہ
کیا جہاں انہوں نے آرمی ٹیم اسپرٹ مقابلوں میں شریک غیر ملکی فوجی ٹیموں سے
ملاقات کی جس میں انہوں نے فٹنس اور ٹیم ورک کے جذبے کی اہمیت کو اجاگر
کیا۔
آئی ایس پی آر کے مطابق اس موقع پر پاک فوج کے سربراہ کا کہنا تھا کہ
پاکستان کے خلاف عالمی تنہائی کا پروپیگنڈا کرنے والے دیکھ لیں ہم تنہا
نہیں اور عالمی دوست ہمیں کیسے اہمیت دیتے ہیں جب کہ دنیا امن و استحکام کے
لیے ہماری کوششوں کو تسلیم کرتی ہے اور غیرملکی ٹیموں کی یہاں موجودگی
ہماری کوششوں کو تسلیم کیے جانے کا ثبوت ہے۔
جنرل قمر جاوید باجوہ نے کہا کہ پاکستان امن پسند ملک ہے اور ہم نے امن و
استحکام کے لیے اہم کردار ادا کیا ہے تاہم دہشت گردی سے نمٹنے کے لیے
مشترکہ جواب دینے کی ضرورت ہے کیوں کہ دہشت گردی پوری دنیا کو متاثر کررہی
ہے۔
ترجمان پاک فوج کے مطابق دوسرے پاکستان آرمی ٹیم اسپرٹ مقابلے میں 10
غیرملکی فوجی ٹیمیں حصہ لے رہی ہیں جن میں چین، انڈونیشیا، اردن، ملائیشیا،
مالدیپ، میانمر، سری لنکا، ترکی، تھائی لینڈ اور برطانیہ کی ٹیمیں شامل
ہیں جب کہ مقابلے منگلا کے قریب پبی میں کل سے شروع ہوں گے۔