کراچی، گارڈن کے علاقے میں تاریخی اسکول پر قبضے کی کوشش ناکام
لینڈ مافیا نے کراچی کے علاقے گارڈن میں قائم قدیم سرکاری اسکول کی زمین پر قبضہ کرنے کے لیے بھاری مشنیری کے ساتھ اسکول پر دھاوا بول دیا۔بلڈوزر کی مدد سے اسکول کی چار دیواری سمیت کئی کلاسز کو منہدم کردیا گیا۔
صوبائی وزیرتعلیم جام مہتاب ڈہر نے کہا ہے کہ سرکاری عمارت کا تحفظ پولیس کی ذمہ داری ہے، سول سوسائٹی ،ایجوکیشن ڈپارٹمنٹ اور میڈیا کی وجہ سے اسکول بچانے میں کامیاب رہے ۔ قومی ورثہ قرار دی گئی عمارت میں بنے اسکول پر لینڈ مافیا نے پولیس کی ملی بھگت سے بلڈوزر چلادئیے۔
گرائے گئے اسکول کے دورے کے موقع پر صوبائی وزیر تعلیم نےمیڈیا سے گفتگو میں کہا کہ پولیس کا سارے عمل میں منفی کردار رہا ،اس کی سرکاری پراپرٹی کے تحفظ کے معاملے خاموشی سوالیہ نشان ہے۔
انہوں نے مزید کہا کہ قبضہ مافیا کے خلاف ایسی کارروائی کریں گے کہ آئندہ کوئی ایسا سوچے گا بھی نہیں،اسکول گرانے میں ملوث افراد کو عبرتناک سزا دلوائیں گے۔
جام مہتاب ڈہر نے کہا کہ ہیریٹیج والے آئیں گے اور وہ یہاں چیزیں محفوظ کریں گے۔انہوں نے اسکول پرنسپل کے کردار کو سراہا ۔
ادھراسکول کے دورے کےدوران سیکریٹری تعلیم عبدالعزیز عقیلی نے اسکول کو اصل حالت میں بحال کرانے کی یقین دہانی کرائی اور کہا کہ دیوار فوری طورپر مکمل کرانے کی ہدایت کردی ہے، متاثرہ بچوں کو اسکول دوبارہ فعال ہونے تک ایڈجسٹ کیاجائےگا۔
ان کا مزید کہناتھاکہ اسکول گرانے میں لینڈ مافیا کے 3لوگ ملوث ہیں، ان کے خلاف ایف آئی آر میں ثقافتی ورثے کو نقصان پہنچانے جیسی سخت دفعات شامل کی گئیں ہیں