لاہور ، وزیراعلیٰ محمد شہبازشریف سے سعودی عرب کے سفیر نواف سعید المالکی کی ملاقات
لاہور میں وزیراعلیٰ محمد شہبازشریف سے سعودی عرب کے سفیر نواف سعید
المالکی نے ملاقات کی ۔ملاقات کے دوران باہمی دلچسپی کے امور،پاکستان اور
سعودی عرب کے درمیان تعلقات کے فروغ اور مختلف شعبوں میں تعاون بڑھانے
پرتبادلہ خیال کیاگیا۔
اس موقع پر وزیراعلیٰ شہبازشریف نے سعودی عرب کے سفیر کے ساتھ عربی زبان میں بھی گفتگو کی۔
ترجمان وزیر اعلیٰ ہاؤس کے مطابق وزیراعلیٰ پنجاب محمد شہبازشریف نے کہا
سعودی عرب ہمارا ایسا برادر دوست ملک ہے جو ہر قسم کے حالات میں پاکستان کے
ساتھ کھڑا رہا ہے۔ پاکستان کے عوام سعودی عرب کے ساتھ دلی اور روحانی
وابستگی رکھتے ہیں۔ دونوں ممالک کے عوام کے درمیان اخوت اور بھائی چارے کا
مضبوط تعلق موجود ہے۔
وزیراعلیٰ پنجاب محمد شہباز شر یف نے کہا سعودی عرب کے ساتھ پاکستان کے
گہرے دوستانہ ،برادرانہ ،مذہبی اورتاریخی تعلقات قائم ہیں۔پاکستان کی سماجی
ترقی اور صنعت و تجارت کے فروغ میں سعودی حکومت کا تعاون اورکردارلائق
تحسین ہے۔
وزیراعلیٰ پنجاب محمد شہباز شر یف نے کہاسعودی عرب نے مشکل کی ہر گھڑ ی میں
پاکستان کا بھر پور ساتھ دیا ہے۔پاکستان سعودی عرب کے ساتھ تعلقات کو
انتہائی اہمیت دیتا ہے۔پاکستان اور سعودی عرب کے گہرے برادرانہ اور دوستانہ
روابط میں وقت کیساتھ مضبوطی آرہی ہے۔
محمد شہباز شر یف نے کہاحکومت ہر شعبہ زندگی میں بہتری لانے کے لئے کوشاں
ہے۔خاطر خواہ وسائل قومی ترقی اور عوامی خوشحالی پر صرف کئے جا رہے
ہیں۔سعودی عرب اور پاکستان کے مابین تجارتی اور اقتصادی تعلقات میں اضافہ
ہو رہا ہے۔
وزیراعلیٰ پنجاب محمد شہباز شریف نے سعودی عرب کے سفیر کی تعیناتی پر نیک
خواہشات کا اظہار کیا۔سعودی عرب کے سفیر نے پنجاب میں سماجی شعبوں کی بہتری
اور عوام کی ترقی کیلئے اٹھائے گئے اقدامات کو سراہا۔
سعودی عرب کے سفیر نواف سعید المالکی نے کہاسعودی عرب پاکستان کے ساتھ
تعلقات کو خصوصی اہمیت دیتا ہے۔ دونوں ملکوں کے درمیان برادرانہ اور
دوستانہ تعلقات مضبوط سے مضبوط تر ہو رہے ہیں۔سعودی عرب اور پاکستان نے
بھائیوں کی طرح ایک دوسرے کا ساتھ نبھایا ہے۔