کراچی،شر پسندعناصر کسی صورت پاک فوج سے نہیں بچ پائیں گے،وزیر داخلہ سندھ
وزیر زراعت و وزیر داخلہ سندھ سہیل انور سیال کاکہناہے کہ دہشت گردی کے
خلاف جنگ کسی اور کی نہیں ہماری اپنی ہے اور اس جنگ میں قو م اور افواج
پاکستان ساتھ ساتھ کھڑے ہیں،شر پسندعناصر کسی صورت پاک فوج سے نہیں بچ
پائیں گے۔
نیشنل میوزیم کے شمشیرالحیدری آڈیٹوریم میں محکمہ زراعت کی تقریب سے خطاب
کرتے ہوئے وزیر زراعت و داخلہ سندھ نے کہاکہ 9 اور 10 محرم کے روز موبائل
فون سروس کی معطلی کے لئے وفاق کو درخواست دے دی ہے جس ضلعے کی انتطامیہ نے
ہمیں درخواست دی وہاں موبائل فون سروس معطل کی جائے گی۔
وزیرداخلہ سندھ نے کہا کہ ایم کیوایم کے بانی بھارتی خفیہ ایجنسی کے ایجنٹ
کلبھوشن یادیو کی طرح غدار ہیں اگر وفاقی حکومت ہمیں اختیارات دے تو ہم
انہیں پھانسی دینے کے لئے تیار ہیں۔
سہیل انور سیال نے کہاکہ پرویز مشرف نے جب 1999 میں حکومت کا تختہ الٹا تو
اس وقت آصف زرداری جیل میں تھے اگر ان کے خلاف کوئی ثبوت موجود تھے تو اس
وقت سامنے کیوں نہیں لائے گئے اب اپیل میں جانے کے بعد سارے انکشافات کیوں
کئے جارہے ہیں اور بے نظیر بھٹو کی شہادت مشرف کے دور صدارت میں ہی ہوئی
تھی اور اس وقت ڈاکٹرذوالفقار مرزا سندھ کے وزیرداخلہ تھے اس وقت مشرف کو
ساری باتیں کیوں یاد نہیں آئیں۔
صوبائی وزیرداخلہ نے مزید کہا کہ بانی ایم کیوایم بھارتی خفیہ ایجنسی را کے
ایجنٹ اور گرفتارمجرم کلبھوشن یادو کی طرح پاکستان کے غدار ہیں اور غدار
کی سزا صرف موت ہے اگر وفاقی حکومت ہمیں اجازت دے دے تو ہم ایم کیوایم کے
بانی کو پھانسی پر لٹکانے کے لئے تیار ہیں، ان کا کہنا تھا کہ ہماری قیادت
نے اپنے ہر وعدے پر عملدرآمد کرکے دکھایا آج کراچی ایک پرامن شہر بن چکا ہے
جس میں سندھ حکومت کے ساتھ ساتھ آرمی اور رینجرز کا کردار مثالی ہے۔