div align="right">لاہور میں وزیراعلیٰ پنجاب محمد شہبازشریف سے معصوم بچی زینب کے قاتل کا
سراغ لگانے اور اسے قانون کی گرفت میں لانے والی ٹیم کے ممبران نے ملاقات
کی۔
ترجمان وزیر اعلیٰ ہاؤس کے مطابق محمد شہبازشریف نے کہا ظلم کا شکار ہونے
والی ننھی زینب کے قاتل کا گرفتار ہونا پوری ٹیم کی اجتماعی کاوش اور دن
رات کی محنت کا نتیجہ ہے۔درندہ صفت ملزم کی گرفتاری کے حوالے سے تمام
اداروں ، سول انتظامیہ اور فرانزک ایجنسی کی کارکردگی لائق تحسین ہے۔بلاشبہ
پوری ٹیم کا یہ ایک عظیم کارنامہ ہے۔ملزم کی گرفتاری پر زینب کے والدین،
بہن بھائی اور ان کے عزیز و اقارب کو اطمینان ملا ہے۔
وزیراعلیٰ پنجاب نے کہا پوری قوم جتنا اضطراب اور غم کی کیفیت میں تھی،
ملزم کی گرفتاری میں کامیابی پر قوم کو اضطراب اور بے چینی کی کیفیت سے
نکالنے میں مدد ملی۔عصر حاضر میں قیام امن اور جرائم کے خاتمے کیلئے جدید
سائنٹیفک طریقے اختیار کرنا ہوں گے۔ پنجاب فرانزک سائنس ایجنسی جنوبی ایشیا
کا بڑا ادارہ ہے جہاں بیرون ممالک سے بھی کیس آتے ہیں۔
محمد شہبازشریف نے کہا معاشرے کو جرائم سے پاک کرنے اور دیگر چیلنجز سے
نمٹنے کیلئے جدید ٹیکنالوجی کو بروئے کارلانا وقت کا تقاضا ہے۔درندہ صفت
ملزم کی گرفتاری پر انفرادی اور اجتماعی طور پر سب کا مشکور ہوں۔ ایسی
مربوط کاوش ماضی قریب میں دیکھنے کو کم ہی ملی ہے۔ جب کسی کام کے کرنے کا
عزم کر لیا جائے تو کامیابی ضرور ملتی ہے۔پوری ٹیم نے ملزم کو قانون کے
شکنجے میں لانے کیلئے سرتوڑ کوشش کی، اللہ نے بھی سرخرو کیا۔ معصوم زینب کے
بیہمانہ قتل پر ہر آنکھ اشکبار تھی۔
صوبائی وزراء رانا ثناء اللہ، کرنل (ر) ایوب گادھی، جہانگیر خانزادہ،
ترجمان پنجاب حکومت ملک احمد خان،مشیر رانا مقبول احمد، انسپکٹر جنرل
پولیس، ایڈیشنل چیف سیکرٹری داخلہ اور مشترکہ تحقیقاتی ٹیم کے اراکین بھی
اس موقع پر موجود تھے۔