Feb 09, 2018 01:04 pm
views : 745
Location : Amigos Welfare Trust For The Blind Persons
Karachi- Governor Sindh visits Amigos Welfare Trust For The Blind Persons
کراچی ، گورنر سندھ کی نابینا افراد میں کمپیوٹرز، بریل کتب اور اسناد تقسیم کرنے کی تقریب میں شرکت
گورنر سندھ محمد زبیر نے امیگوز ویلفیئر ٹرسٹ برائے نابینا افراد کی جانب
سے کمپیوٹر، بریل کتب، مالی امداد کے چیک اور اسناد تقسیم کرنے کی تقریب سے
خطاب کرتے ہوئے کہا ہے کہ جسمانی طور پر معذوری کا شکار افراد ہمارے
معاشرے کا ناگزیر حصہ ہیں اور یہ معاشرے کی اجتماعی ذمہ داری ہے کہ ان کی
حوصلہ افزائی کے ساتھ ساتھ مسائل کے حل کے لئے بھرپور مدد فراہم کی جائے۔
محمد زبیر نے کہا کہ جسمانی کمی کا شکار افراد کی مدد اور ان کو روز مرہ
زندگی گزارنے میں تعاون فراہم کرنے کیلئے معاشرے میں آگاہی بیدار کرنے کی
اشد ضرورت ہے اس ضمن میں ٹرسٹ نمایاں کام کررہا ہے اور یہ دوسرے اداروں کے
لئے ایک قابل تقلید مثال ہے۔
گورنر سندھ محمد زبیر نے ٹرسٹ کی آن لائن ڈیجیٹل لائبریری اور ویب سائٹ کے
قیام کو سراہتے ہوئے کہا کہ ان کے ذریعہ انہیں درسی کتب کے ساتھ ساتھ دیگر
تعلیمی مواد بھی سننے اور اسے ڈاؤن لوڈ کرنے کا موقع ملے گا اور اسے وہ
اپنی معلومات کے لئے زیادہ بہتر طریقہ سے استعمال کرسکیں گے۔
گورنر سندھ نے ٹرسٹ کی جانب سے پرنٹنگ پریس اور کمپیوٹر ٹریننگ انسٹیٹیوٹ
کے آغاز کو سراہتے ہوئے کہا کہ ان کے ذریعہ بریل کتب کی چھپائی ممکن ہورہی
ہے اور نابینا افراد کو کمپیوٹر کی تعلیم بھی فراہم کی جارہی ہے۔ حکومت
معذوروں کے 5فی صد کو ٹہ پر عملدرآمد کے لئے بھرپور اقدامات کررہی ہے تاکہ
تعلیم یافتہ اور باصلاحیت معذور افراد کو روزگار فراہم کیا جاسکے۔
گورنر سندھ محمد زبیر نے معذور افراد خصوصاً بصارت سے محروم سے افراد کی
فلاح و بہبود کی کاوشوں میں اپنے بھرپور تعاون کی یقین دہانی کرائی۔ گورنر
سندھ نے مخیر افراد پر زور دیا کہ وہ جسمانی معذوروں اور دیگر مسائل میں
مبتلا افراد کی دل کھول کر مدد کریں تاکہ وہ اپنے پیروں پر کھڑے ہوکر
معاشرہ میں اپنی ذمے داریوں کو بھرپور طریقہ سے ادا کرسکیں۔
ٹرسٹ کے صدر انور مسیح نے گورنر سندھ کو نابینا افراد کے مسائل اور ٹرسٹ کی
جانب سے کئے جانے والے اقدامات کے بارے میں بتایا۔ ٹرسٹ کے صدر نے گورنر
سندھ کو بتایاکہ جسٹس ہیلپ لائن کے صدر ندیم شیخ ایڈووکیٹ کی کاوشوں سے
بلدیاتی اداروں میں کام کرنے والے 9 نابینا افراد کو مستقل کرایا گیا ہے
جبکہ 61 اعلیٰ تعلیم یافتہ نابینا افراد کو ملازمت کی فراہمی کے لئے عدالت
عالیہ سے رجوع کیا گیا ہے۔
اس موقع پر ٹرسٹ کے صدر انور مسیح اور دیگر عہدیدار بھی موجود تھے۔