اسلام آباد، جتنا ظلم کروگے عوام اتنا ہی (ن)لیگ کا ساتھ دیں گے،نواز شریف
سابق وزیر اعظم نواز شریف کا کہنا ہے کہ ظلم کے آگے کھڑا ہونا ضروری ہے جتنا ظلم کروگے عوام اتنا ہی (ن)لیگ کا ساتھ دیں گے۔
احتساب عدالت کے باہر ذرائع ابلاغ عامہ کے نمائندوں سے گفتگو کرتے ہوئے
نواز شریف کا کہنا تھا کہ وزیراعظم کو اس طرح سے نکال کر باہر پھینکنے کو
پاکستان کے عوام برداشت نہیں کرینگے، ظلم کے آگے کھڑا ہونا ضروری ہے، جتنا
ظلم کروگے عوام اتنا ہی ساتھ دیں گے۔
نواز شریف کا کہنا تھا کہ پاکستان کی عوام بھیڑ بکریاں نہیں، وہ ووٹ سے
وزیراعظم منتخب کریں اور چند لوگ اسے اٹھا کر باہر کردیں، بغیر کسی وجہ کے
وزیراعظم کو باہر نکال کر پھینک دیاگیا، وزیر اعظم نے کسی کا خون نہیں کیا،
ڈاکا نہیں ڈالا کہ اسےاٹھا کر باہر پھینک دیا جائے، سرگودھا میں بھی ہمارے
امیدوار سےشیر کا نشان چھین لیاگیا، نشان چھیننے سے کیا ہمارا نشان مٹا
دیں گے۔
سابق وزیر اعظم نے کہا کہ ایک بھی ووٹ نہ رکھنے والی جماعت کو سینیٹ
امیدوار کھڑا کرنے کا کیا حق ہے، پارٹی کو اس کےنشان سے محروم کرکے
ووٹرکومشکل میں ڈالاگیا، نئے نشان پر الیکشن لڑ کر بھی ہمارا امیدوار
کامیاب ہوا، سرگودھا کے ضمنی الیکشن کا رزلٹ آنکھیں کھولنے کیلیے کافی ہے،
مسلم لیگ (ن) اور ہمارا بیانیہ صحیح ہے، ووٹ کو عزت دو عوام کا نعرہ بن
چکاہے۔
نواز شریف نے مزید کہا کہ پاکستان میں ایسانہ چلا ہے اور نہ چلنے دیں گے،
میری نااہلی کو عوام نے تسلیم نہیں کیا، فیصلے میں جان ہوتی تو عوام تسلیم
کرلیتے، ہم نے صحیح کو صحیح اور غلط کو غلط کہنا ہے، عوام اب سکھا شاہی
برداشت نہیں کرینگے،یہ کسی فرد واحد کا ملک نہیں ہے، پچھلے 70سال جیسے گزرے
اگلے 70سال ایسے نہیں گزریں گے، عوام محسوس کررہے ہیں کہ (ن) لیگ کا موقف
درست ہے۔