کراچی، حزب اختلاف نے نامناسب قرارداد کو بنیاد بناکر واک آؤٹ کیا، سعید غنی
وزیر بلدیات وکچی آبادی سندھ سعید غنی کا کہنا ہے کہ صوبائی اسمبلی کی کارروائی مجموعی طور پر بہتر طریقے سے چلی ہے لیکن ایک نامناسب قرارداد کو بنیاد بناکر حزب اختلاف نے کارروائی سے تھوڑی دیر کیلئے واک آؤٹ کیا۔
سندھ اسمبلی کے اجلاس سے قبل ذرائع ابلاغ عامہ کے نمائندوں سے گفتگو کرتے ہوئے سعید غنی کا مزید کہنا تھا کہ حکومت کے پاس یہ اختیار ہوتا ہے کہ کسی بھی مسئلے کیلئے کسی بھی وزارت میں مختلف کمیٹیاں بنائی جائیں اور اور اپنی مرضی کے لوگ اس میں شامل کریں۔
انہوں نے کہا کہ اقلیتی برادری کے صوبے بھر میں رہنے والے لوگوں کی فلاح کیلئے ایک کمیٹی بنائی گئی ہے اس کمیٹی میں تمام اقلیتوں کے لوگ رکھے گئے ہیں اس کے علاوہ اس میں دو سینیٹرز، ارکان قومی وصوبائی اسمبلی بھی شامل ہیں جن کا تعلق سندھ سے ہے تاہم اپوزیشن کی طرف سے ایک قراداد سامنے لائی گئی کہ اس کمیٹی میں جو لوگ رکھے گئے ہیں وہ غیر قانونی اور غیر آئینی طریقہ ہے۔
سعید غنی کا یہ بھی کہنا تھا کہ یہ ضروری نہیں کہ کمیٹی میں اپوزیشن کے لوگ ہونے چاہئیں ،یہ ان کا حق نہیں ہے لیکن اگر پھر بھی وہ کمیٹی میں شمولیت رکھنے کے خواہاں ہیں تو ان کو چاہیے کہ وہ متعلقہ وزیر سے رابطہ قائم کریں لیکن اس طرح سے قرارداد لاکر شور شرابا کرکے یہ مطالبہ رکھا جانا اس طرح کوئی حکومت کام نہیں کرسکتی۔