div>وزیراعظم عمران خان نے ضلع نارووال کے علاقے کرتارپور میں قائم گردوارا
دربار صاحب کو بھارت کے شہر گورداس پور میں قائم ڈیرہ بابا نانک سے منسلک
کرنے والی راہداری کا سنگِ بنیاد رکھ دیا۔
سنگِ بنیاد رکھنے کی تقریب میں چیف آرمی اسٹاف جنرل قمر جاوید باجوہ، وزیر
خارجہ شاہ محمود قریشی، سرکاری عہدیدار، بھارتی وزرا، مختلف ممالک کے
سفارتکار، گورنر پنجاب چوہدری محمد سرور اور وزیر اعلیٰ عثمان بزدار نے بھی
شرکت کی۔
اس موقع پر بھارت کی وفاقی وزیر خوراک ہرسمرت کور بادل، وفاقی وزیر ہاؤسنگ
ہردیپ پوری، بھارتی صحافی، غیر ملکی سفارت کار اور پاکستان اور بھارت سے
آئے ہوئے بڑی تعداد میں سکھ زائرین نے شرکت کی۔
سنگ بنیاد کی تقریب کے آغاز میں سکھ برادری کے زائرین سے متعلق ایک
دستاویزی فلم نشر کی گئی۔
تقریب سے خطاب کرتے ہوئے وزیراعظم عمران خان کا کہنا تھا کہ کرتارپور دربار کو
بہتر سے بہتر کریں گے اور سہولیات دیں گے، جب بابا گرونانک کا 550 واں جنم
دن آئے گا تو ہر طرح کی سہولیات فراہم کریں گے۔ جب میں بھارت جاتا تھا تو لوگ کہتے تھے کہ فوج پاک
بھارت دوستی نہیں ہونے دے گی لیکن آج میں یہ کہتا ہوں کہ پاکستان کی سیاسی
اور عسکری قیادت بھارت سے تعلقات پر ایک پیج پر ہے۔
عمران خان کا کہنا تھا کہ میں نے 21 سال کرکٹ اور 22 سال سیاست کی، کرکٹ کے
دور میں 2 طرح کے کھلاڑیوں سے ملا، ایک کھلاڑی وہ تھا جو میدان میں قدم
رکھتا تھا تو اس کے ذہن میں ہارنے کا خوف ہوتا تھا اور دوسرا وہ کھلاڑی
ہوتا تھا جو قدم رکھتا تھا تو جیتنے کا سوچتا تھا۔ جب میں سیاست میں آیا تو 2 طرح کے سیاستدانوں سے ملا، جس
میں بدقسمتی سے وہ سیاست دان تھے جو اپنے مقاصد کے لیے آتے تھے اور وہ
نظریے کے ساتھ نہیں چلتے تھے اور اپنے مفادات کے لیے عوام کو قربان کردیتے
تھے جبکہ ایک طرف ایسا سیاستدان تھا جو بڑی سوچ کے ساتھ آتا تھا اور وہ
انسانوں کی بہتری کے لیے آتا تھا۔
وزیر اعظم نے کہا کہ پاکستان اور بھارت آج جہاں کھڑے ہیں، 70 سال سے یہی
ماحول دیکھ رہے ہیں اور اس کے لیے دونوں طرف سے غلطیاں ہوئی اور جب تک ماضی
کی زنجیروں کو نہیں توڑیں گے صورتحال یہی رہے گی۔ پاکستان اور بھارت وہاں کھڑے ہیں کہ ہم اندازہ ہی
نہیں لگا سکتے کہ اللہ نے ہمیں یہ مواقع دیے، اگر فرانس اور جرمنی ایک
ساتھ مل کر رہ سکتے ہیں تو ہم دونوں ممالک کیوں نہیں۔
وزیر اعظم کا کہنا تھا کہ پاک بھارت تعلقات میں ایک مسئلہ ہے اور وہ کشمیر
ہے، انسان چاند پر پہنچ چکا ہے ، کیا ہم ایک مسئلہ حل نہیں کرسکتے؟ اس کے
لیے ارادہ چاہیے اور میں یقین دلاتا ہوں کہ اگر ارادہ ہو تو یہ مسئلہ حل
ہوسکتا ہے۔
ان کا کہنا تھا کہ میں بھارت سے مضبوط تعلقات چاہتا ہوں، برصغیر میں سب سے
زیادہ غربت ہے، برصغیر کی غربت ختم کرنے کے لیے سرحدیں کھولنا ہوں گی۔