Dec 16, 2018 06:31 pm
views : 508
Location : Bilawal chorangi
Karachi- PTI Leader Khurram Sher Zaman Media Talk
کراچی، کراچی کے غریبوں کیلئے آواز اٹھانے پر میئرکراچی میرے خلاف 50کروڑ ہرجانے کا دعویٰ کردیا، خرم شیر زمان
پاکستان تحریک انصاف سے تعلق رکھنے والے رکن سندھ اسمبلی خرم شیر زمان کا کہنا ہے کہ سندھ کے ایک معروف سیاستدان نہر خیام پر قبضہ کرکے بہت بڑی عمارت بنارہے ہیں جس کا تعمیراتی کام جاری ہے، وہ زیر تعمیر عمارت جوتجاوزات کے زمرے میں ہی آتی ہے وہ کب اورکیسے گرائی جائے گی۔
کلفٹن میں بلاول ہاؤس چورنگی کے قریب ذرائع ابلاغ عامہ کے نمائندوں سے گفتگو کرتے ہوئے خرم شیر زمان کا مزید کہنا تھا کہ تھاکہ تجاوزات کے خاتمے کیلئے چیف جسٹس آف پاکستان کے احکامات کو حکومت پاکستان مکمل سپورٹ کرتی ہے۔
انہوں نے میئر کراچی کو مخاطب کرتے ہوئے کہا کہ جولوگ ناجائز کریں گے،غریبوں کو تنگ کریں گے اور امیروں کوچھوڑدینگے اور ان کی سرپرستی کرکے ان کامکمل ساتھ دینگے تو یہ اچھی بات نہیں ہے، میں نے کراچی کے غریبوں کیلئے آواز اٹھائی تو میئرکراچی نے میرے خلاف 50کروڑ ہرجانے کا دعویٰ کردیالیکن کوئی بات نہیں ، کراچی کے عوام نے ہمیں ووٹ دیکر منتخب کیا ہے ہم ان کے ساتھ کھڑے رہ کر انہیں مکمل سپورٹ کریں گے۔میں جلد آپ کو اس ہرجانے کے دعویٰ کا جواب دونگا۔
انہوں نے یہ بھی کہا کہ اگر آپ غریبوں کے گھر گرائیں گے اور ان کے ساتھ ناجائز کریں گے تو ہم آپ کو بار بار یاد دہانی کرواتے رہیں گے، انہوں نے اپنے پیچھے موجود دیوار کی طرف اشارہ کرتے ہوئے کہا کہ میں کراچی کے شہریوں اورعوام کے سامنے یہ بات لانا چاہتا ہوں کہ یہ لوگ صرف غریبوں کے گھر گرارہے ہیں جبکہ امیروں کی ناجائز دیواریں،محل اورتجاوزات اپنی جگہ پر قائم ہیں، انہوں نے سوال کیا کہ یہ امیروں اورسیاستدانوں کی تجاوزات کب ختم کی جائیں گی۔
انہوں نے میڈیا سے مطالبہ کیا کہ آپ جاتے ہوئے بلاول ہاؤس کے اطراف کی وڈیوبناکر جائیں اوردنیا کو دکھائیں کہ یہاں کے عوام کو کتنی تکلیف اورپریشانی کا سامنا ہے، انہوں نے کہا کہ یہ کلفٹن میرا انتخابی حلقہ ہے، میں چیف جسٹس آف پاکستان سے گزارش کرتاہوں کہ کلفٹن میں قائم تجاوزات اورمیئرکراچی کی جانب سے صرف غریبوں کے گھر گرائے جانے کا نوٹس لیاجائے۔
خرم شیرزمان نے میئر کراچی کومخاطب کرتے ہوئے کہا کہ آپ کو اگر تجاوزات کے خاتمے کے سلسلے میں کسی کا ڈر یا خوف ہے تو میں امیروں اور سیاستدانوں کی تجاوزات کے خاتمہ کیلئے آپ کے ٹریکٹر پر میں خود بیٹھ کر تجاوزات گراؤنگااور میری مکمل سپورٹ آپ کو ملے گی اور میں آپ کا مکمل ساتھ دونگا۔