Sep 23, 2019 07:10 pm
views : 297
Location : Domestic place
New york- PM appreciates Amnesty’s role in highlighting rights violations in IOJ&K.
وزیراعظم عمران خان سے نیویارک میں ایمنسٹی انٹرنیشنل کے سیکریٹری جنرل کومی نائیڈو کی ملاقات
وزیراعظم عمران خان ان دنوں امریکا کے دورے پر موجود ہیں جہاں وہ 23 ستمبر کو امریکی صدر ڈونلڈ ٹرمپ سے ملاقات کریں گے اور 27 ستمبر کو اقوام متحدہ کی جنرل اسمبلی اجلاس سے خطاب کریں گے۔
وزیراعظم عمران خان سے نیویارک میں ایمنسٹی انٹرنیشنل کے سیکریٹری جنرل کومی نائیڈو نے ملاقات کی جس میں 5 اگست کے بعد سے مقبوضہ کشمیر میں انسانی حقوق کی خلاف ورزیوں پر تبادلہ خیال کیا گیا۔
ملاقات میں وزیراعظم نے مقبوضہ جموں و کشمیر میں حالیہ واقعات اور انسانی حقوق کی خلاف ورزیوں کو بین الاقوامی سطح پر اجاگر کرنے میں ایمنسٹی انٹرنیشنل کے کردار کو سراہا۔
وزیراعظم نے کشمیری نوجوانوں پر بھارتی فوج کی پیلٹ گنوں کے استعمال کے تباہ کن اثرات پر ایمنسٹی کی رپورٹ کوسراہا۔
ایمنسٹی انٹرنیشنل کے سیکریٹری جنرل نے وزیراعظم کو بھارتی حکومت کی جانب سے مقبوضہ جموں و کشمیر میں انسانی حقوق کی تنظیموں کی عوام تک رسائی اور ان کے کام میں ڈالی جانے والی رکاوٹوں سے آگاہ کیا۔
کومی نائیڈو نے کشمیر کو بولنے دو مہم کے تحت ایمنسٹی انٹرنیشنل کے اقدامات اور ماحولیات کیلئے ایمنسٹی کے کام سے آگاہ کیا۔
وزیراعظم عمران خان سے امریکی نمائندہ خصوصی زلمے خلیل زاد نے بھی ملاقات کی جس میں افغان امن عمل اور خطے کی صورتحال پر تبادلہ خیال کیا گیا۔
وزیراعظم سے زلمے خلیل زاد کی ملاقات 40 منٹ جاری رہی جبکہ ملاقات میں وزیرخارجہ شاہ محمود، ملیحہ لودھی اور نعیم الحق سمیت دیگر بھی شریک تھے۔
ذرائع کے مطابق زلمےخلیل زاد نے وزیراعظم کو صدر ٹرمپ سے مجوزہ ملاقات سے متعلق پیغام بھی پہنچایا۔