اسلام آباد، پاکستان کو سفارتکاری کیلئے محفوظ ملک قرار دیا جاچکا ہے، وفاقی وزیر داخلہ
وزیر داخلہ اعجاز شاہ کا کہنا ہے کہ پاکستان کو سفارت کاری کے لیے محفوظ ملک قرار دیا جا چکا ہے، پولیس کے محکمے میں 9 سال بعد بھرتیاں کی جارہی ہیں۔
وزیر داخلہ اعجاز شاہ نے میڈیا سے گفتگو کرتے ہوئے کہا کہ 9 سال میں اسلام آباد کی آبادی تین گنا بڑھ گئی ہے، آبادی میں اضافے کے باوجود اسلام آباد پولیس میں اضافہ نہیں ہوا۔
وزیر داخلہ کا کہنا تھا کہ پاکستان کو سفارت کاری کے لیے محفوظ ملک قرار دیا جا چکا ہے، پولیس کے محکمے میں 9 سال بعد بھرتیاں کی جارہی ہیں۔ اسلام آباد پولیس میں 12 سو 60 اہلکار بھرتی کیے جائیں گے۔
انہوں نے کہا کہ نریندر مودی کی حکومت اس وقت دباؤ میں ہے، وزیر اعظم نے جو آواز اٹھائی ہے امید ہے مقبوضہ وادی سے کرفیو اٹھے گا۔ 27 اکتوبر کو مقبوضہ کشمیر میں بھارت نے قبضہ کیا تھا۔
اس سے قبل ایک موقع پر اعجاز شاہ کا کہنا تھا کہ پوری قوم کو فخر ہے انہوں نے عمران خان جیسے لیڈر کو چنا ہے، دنیا کو پیغام گیا ہے کہ پاکستان کشمیر پر اپنے مؤقف سے پیچھے نہیں ہٹے گا۔
وزیر داخلہ کا کہنا تھا کہ عمران خان نے بھارت کا گھناؤنا چہرہ دنیا کے سامنے رکھ دیا، وہ پہلے لیڈر ہیں جنہوں نے پاکستان اور اسلام کی بھی نمائندگی کی ہے۔
انہوں نے کہا تھا کہ آج کشمیری بھائیوں کو یقین ہوگیا ہم ہر صورت ان کے ساتھ ہیں اور کشمیر کے حق کے لیے ہر حد تک جائیں گے۔