راولپنڈی، چینی صدر نے یقین دلایا کہ جب بھی پاکستان کو ضرورت پڑی چین خاموش نہیں بیٹھے گا، ترجمان پاک فوج
سینئر صحافیوں کودورہ چین کے حوالے سے بریفنگ میں ڈی جی آئی ایس پی آر میجر جنرل آصف غفور نے کہا ہے کہ کشمیر کے معاملے پر وزیراعظم اور آرمی چیف کا دورہ چین انتہائی کامیاب رہا، چینی صدر نے یقین دلایا کہ جب بھی پاکستان کو ضرورت پڑی چین خاموش نہیں بیٹھے گا۔
ڈی جی آئی ایس پی آر نے بتایا کہ چینی صدر نے بھارت جانے سے پہلے وزیراعظم اور آرمی چیف کو دورے کی دعوت دی، دورہ چین میں تین نکاتی ایجنڈا تھا، جس میں مقبوضہ کشمیر، سی پیک اور دفاعی تعاون شامل تھا، چینی صدر نے کہا کہ پاکستان کی خودمختاری کیلئے چین تعاون جاری رکھے گااور جب بھی پاکستان کو ضرورت پڑی چین خاموش نہیں بیٹھے گا۔
ڈی جی آئی ایس پی آر کے مطابق چینی صدر نے کہا کہ سول اورفوجی قیادت مل کر کام کر رہی ہے جو اچھی بات ہے ہم پاکستان کی معیشت کو پھلتا پھولتا دیکھنا چاہتے ہیں پاکستان کے ساتھ تعلقات میں کوئی تبدیلی نہیں آئے گی۔
میجر جنرل آصف غفور کا کہنا تھا کہ کشمیرکے معاملے پر دورہ انتہائی کامیاب رہا، چینی صدر نے مقبوضہ کشمیر میں بھارتی اقدامات کو چین پر بھی حملہ قرار دیا، وزیراعظم عمران خان نے چینی صدر سے کہاکہ وہ مودی کو حالات سے خبردار کریں، عمران خان نے چینی صدر کو صنعتیں پاکستان منتقل کرنے کو کہا اور چین پر واضح کیا کہ ہمیں امداد نہیں چاہیے۔