Aug 28, 2020 08:25 pm
views : 233
Location : Different Places
Karachi- PMD predicts more rain in Karachi
کراچی میں مزید بارشوں کی پیشگوئی، ایوی ایشن ڈویژن کو ایڈوائزری الرٹ جاری
محکمہ موسمیات نے کراچی میں پیر تک مزید بارشوں کی پیش گوئی کر دی، ایوی ایشن ڈویژن کو ایڈوائزری الرٹ جاری کر دیا گیا ہے۔
کراچی کے مکین مزید بارشوں کے لئے تیار رہیں، محکمہ موسمیات کے مطابق کراچی میں مزید بارش ہونے کا امکان ہے۔ اتوار اور پیر کو کراچی میں تیزبارش سے صورتحال مزید خراب ہونے کا خدشہ ہے۔ ایڈوائزری میں کہا گیا ہے کہ بارشوں کے نئے سلسلے کے پیش نظرمناسب انتظامات کیے جائیں، سندھ میں تیزبارشوں کا نیا سلسلہ ستمبر کے دوسرے ہفتے میں شروع ہو گا۔
واضح رہے کہ کراچی کے کئی علاقوں میں گزشتہ دنوں بارش کے سبب جمع ہونے والے پانی کی نکاسی تاحال نہیں ہوسکی، ڈیفنس اور کورنگی کراسنگ ابھی تک زیر آب ہیں، طوفانی بارش سے نرسری فرنیچر مارکیٹ میں پانچ سے سات فٹ تک پانی جمع ہوا، دکانوں میں پانی داخل ہونے سے قیمتی فرنیچر خراب ہوگیا۔ بارش کے بعد سے متعدد علاقوں میں تاحال بجلی بھی بحال نہ ہوسکی۔ قائد آباد، گلشن حدید، گلشن معمار میں بجلی کی بندش کو 24 گھنٹے گزر گئے۔