Jan 22, 2021 02:55 pm
views : 232
Location : Domestic Place
Karachi- Sindh hints at postponing exams due to prolonged school closure
کراچی، سندھ میں تعلیمی ادارے یکم فروری سے کھلیں گے، سعید غنی
سندھ کے وزیر تعلیم نے یکم فروری سےتمام اسکول کھولنے کا اعلان کرتے ہوئے کہا ہے کہ امتحانات جلد بازی میں نہ کرانے پر اسٹیئرنگ کمیٹی ارکان میں اتفاق موجود ہے، رواں برس بغیر امتحان بچوں کو کسی بھی صورت پروموٹ نہیں کیا جائے گا۔
کراچی میں پریس کانفرنس سے خطاب کرتے ہوئے وزیر تعلیم سندھ سعید غنی کا یہ بھی کہنا تھا کہ تعلیمی اداروں میں کورونا ٹیسٹنگ کی رفتار بڑھائی جائے گی، پہلے سے طے ہے ہر جماعت کے پچاس فیصد طلبا سکول آئیں گے۔ کورس کو مزید کم نہیں کرسکتے چاہے امتحانات کوری شیڈول کیوں نہ کرنا پڑے۔
قبل ازیں وزیر تعلیم سعید غنی کی زیرصدارت محکمہ تعلیم کی اسٹیرنگ کمیٹی کا اجلاس ہوا جس میں سیکرٹری تعلیم، سیکرٹری کالجز سندھ،اسکول ایسوسی ایشنز کے نمائندے اور دیگرشریک ہوئے۔ اجلاس میں یکم فروری سے پرائمری، مڈل اور سیکنڈری کلاسز کھولنے کے حوالے سےگفتگو ہوئٰی ۔
وزیر تعلیم کا اس موقع پر کہنا تھا کہ ہمیں غیرمعمولی حالات کو مدنظر رکھ کر غیرمعمولی فیصلے کرنے ہوں گے، کورونا کے باعث سب متاثرہوا،شیڈول کے مطابق آنے میں وقت لگے گا، نئے تعلیمی سال کے حوالے سے بھی حالات کو دیکھ کر ہمیں پلان کرنا ہوگا۔ امتحانات کے شیڈول اور سلیبس کے حوالے سے بھی مشاورت کی گئی ہے۔