Apr 23, 2021 03:15 pm
views : 191
Location : Domestic Place
Islamabad- Lockdown could take place before Eid, Asad Omar warns
اسلام آباد، عید سے پہلے لاک ڈاؤن لگ سکتا ہے، لوگ عید کی شاپنگ ابھی سے کرلیں پھر نہ کہنا بتایا نہیں تھا،اسد عمر نے خبردار کردیا، عید تک آؤٹ ڈور ڈائننگ پر بھی پابندی عائد
وزیراعظم عمران خان کی زیرصدارت قومی رابطہ کمیٹی برائے کوویڈ کا اجلاس ہوا ۔ اجلاس میں وفاقی وزراء اور اعلی صوبائی حکام نے شرکت کی اور صوبائی وزرائے اعلی ویڈیو لنک کے ذریعے شریک ہوئے۔ اجلاس میں کورونا پابندیاں مزید سخت کرنے پر غور کیا گیا۔
اجلاس کے بعد میڈیا بریفنگ میں سربراہ این سی او سی اور وفاقی وزیر منصوبہ بندی اسد عمر نے بتایا کہ ہوسکتا ہے ایسی صورتحال پیدا ہو کہ شہروں میں لاک ڈاؤن کرنا پڑے، عید تک آؤٹ ڈور ڈائننگ پر بھی پابندی لگائی جارہی ہے تاہم صرف ٹیک اوے کی اجازت ہوگی، جم اورایکسرسائز سنٹرز پر بھی پابندی لگائی جارہی ہے۔
اسد عمر نے کہا کہ دفاتر دو بجے بند کردیئے جائیں اور پچاس فیصد سے زیادہ لوگوں کو نہ بلایا جائے، جن علاقوں میں کورونا مثبت کیسز کی شرح پانچ فیصد سے زیادہ ہے وہاں اسکول عید تک بند کئے جائیں گے جن میں میٹرک اور انٹر کلاسز بھی شامل ہیں، بازار شام چھ بجے تک کھلیں گے، اس کے بعد صرف اشیائے ضروریہ کی دکانیں کھلیں گی، افطاری کے بعد بازار نہیں کھلیں گے، خواتین عید کی شاپنگ ابھی سے شروع کردیں، آخری دنوں کا انتظار نہ کریں کیونکہ ہوسکتا ہے آگے لاک ڈاؤن کردیا جائے۔
اسد عمر کا کہنا تھا کہ آکسیجن کے استعمال کی نوے فیصد پیداواری صلاحیت تک پہنچ گئے ہیں، اس میں سے اسی فیصد کورونا اور صحت کے لیے استعمال ہورہی ہے، اس کی سپلائی کو بہتر کرنے کی کوشش کررہے ہیں اور باہر سے بھی درآمد کرسکتے ہیں۔