لاہور،جب پاکستان تحریک انصاف نے حکومت سنبھالی تو خزانہ بالکل خالی تھا ، علیم خان
سینئر وزیر پنجاب عبد العلیم خان کہتے ہیں کہ ق لیگ اتحادی ہے، گلے شکوے گھر میں بھی ہو جاتے ہیں، گلے شکوے کا اظہار کر کے ان کو دور کیا جاتا ہے، ق لیگ کی قیادت وزیراعظم پر اعتماد کرتی ہے۔
لاہور میں ذرائع ابلاغ عامہ کےنمائندوں سے بات کرتے ہوئےصوبائی وزیر بلدیات کا کہنا تھا کہ جب پاکستان تحریک انصاف نے حکومت سنبھالی تو خزانہ بالکل خالی تھا ، اس مہنگائی کے ذمہ دار وہ لوگ ہیں جنہوں نے سرکاری خزانے سے 80 کروڑ لے کر اپنے ذاتی گھروں کی دیواریں تعمیر کیں اور کمیشن لے کر اپنی تجوریاں بھریں۔
صوبائی وزیر نے کہا کہ 300 ارب سے جو منصوبہ سابقہ حکومت نے بنایا تھا اس کو مکمل کرنے کے لیے ہمیں مزید 25 سے 30 ارب روپیہ چاہیے اور بعد ازاں اس کو چلانے کے لیے اربوں روپے ماہانہ چاہیے۔
ان کا کہنا تھا کہ صرف سوئی گیس کا ڈیفالٹ 150 ارب روپے کا تھا، اس وقت مشکل حالات ہیں ، پی ٹی آئی کی حکومت اس بات کو تسلیم کرتی ہے کہ عام آدمی کو اس کا نقصان ہورہا ہے،انہوں نے کہا کہ جنوبی پنجاب کے حوالے سے ایک کمیٹی وزیر اعلیٰ پنجاب نے تشکیل دی تھی اس کا اجلاس ہورہا ہے، اس حوالے سے عوام جلد خوشخبری سنے گی۔