لاہور، سرفراز احمد کپتانی سے فارغ، اظہر علی ٹیسٹ، بابر اعظم ٹی ٹونٹی ٹیم کے کپتان مقرر
http://www.tnnasia.tv
پاکستان کرکٹ بورڈ نے سرفراز احمد کو تینوں فارمیٹ کی کپتانی سے ہٹا دیا۔ ان کی جگہ اظہر علی کو قومی ٹیسٹ کرکٹ ٹیم اور بابر اعظم کو ٹی ٹونٹی ٹیم کا کپتان مقرر کیا گیا ہے۔
ورلڈ کپ میں مایوس کن کارکردگی، سری لنکا سے وائٹ واش کے بعد پی سی بی نے سرفراز احمد کو تینوں فارمیٹس سے میں ٹیم کی کپتانی سے ہٹا دیا۔
سرفراز کی کپتانی میں ٹیم نے13 ٹیسٹ کھیلے ہیں، جن میں سے 4 جیتے 8 ہارے۔ 50 ون ڈے میں سے 28 جیتے 20 ہارے جبکہ 37 ٹی ٹونٹی میچز میں سے 29 جیتے 8 ہارے۔ سرفراز کی کپتانی میں پاکستان نے بھارت کو ہرا کر چمپئنز ٹرافی جیتی تھی جبکہ سرفراز نے اپنی کپتانی میں پاکستان کو کوالیفائنگ کھیلنے سے بچایا۔
پی سی بی کے نئے فیصلے کے مطابق اظہر علی آسٹریلیا کے خلاف 2 ٹیسٹ میچز میں قومی ٹیسٹ ٹیم کی قیادت کریں گے جبکہ بابر اعظم کو قومی ٹی ٹونٹی کرکٹ ٹیم کا کپتان بنایا گیا ہے، بابر اعظم آسٹریلیا کے خلاف 3 ٹی ٹونٹی میچز میں قومی ٹی ٹونٹی ٹیم کی قیادت کریں گے۔ بتایا گیا ہے کہ سرفراز احمد کو دونوں فارمیٹ میں ناقص کارکردگی کی بنیاد پر کپتانی سے ہٹایا گیا۔
سیریز کے لیے نائب کپتان کا تقرر جلد کردیا جائے گا، آسٹریلیا کے خلاف ٹیسٹ اور ٹی ٹونٹی سکواڈز کا اعلان 21 اکتوبر کو کیا جائے گا۔ اظہر علی کو ٹیسٹ چیمپئین شپ کے سیزن 2019-20 کے لیے کپتان مقرر کیا گیا ہے جبکہ بابر اعظم کو آسٹریلیا میں ہونے والے ٹی ٹونٹی ورلڈ کپ 2020 تک کپتان مقرر کیا گیا ہے۔ اظہر علی کپتان مقرر کئے جانے کے بعد آج سہ پہر 3 بجے پریس کانفرنس کریں گے۔