Oct 18, 2019 08:05 pm
views : 293
Location : Different Places
Karachi- Firefighters Strike on non Payment Allowance
کراچی،فائر فائٹرز کی کام چھوڑ ہڑتال جاری
کراچی کی شارع فیصل پر ایک کمپنی کے دفترمیں آگ لگ گئی، تاہم فائر بریگیڈ کا عملہ ہڑتال پر ہونے کے باعث آگ بجھانے نہیں پہنچا ہے۔
ذرائع کے مطابق کراچی کے علاقے پی سی سی ایچ ایس بلاک 6 محمد علی سوسائٹی میں واقع ایک نجی کمپنی میں آتش زدگی کا واقعہ پیش آیا ہے۔
شہر میں فائر بریگیڈ کی جاری ہڑتال کے باعث عملہ بلائے جانے پر بھی ریسکیو کے لیے نہیں پہنچا ہے۔
ذرائع کے مطابق آگ بجھانے کے عمل میں پاک بحریہ کے 2 فائر ٹینڈر حصہ لے رہے ہیں، جبکہ علاقے اور عمارت میں موجود لوگ بھی اپنی مدد آپ کے تحت آگ بجھانے کی کوششوں میں مصروف ہیں۔
کراچی بھر کے فائر فائٹرز کی جانب سے کام چھوڑ ہڑتال کی جا رہی ہے جس کے باعث عوام کی جان و مال کو خطرہ لاحق ہو گیا ہے۔
فائر فائٹر ویلفئیر آرگنائزیشن کے مطابق فائر بریگیڈ ملازمین نے کام کرنے سے انکار کر دیا ہے۔
فائر فائٹرز کی جانب سے کراچی کے تمام اسٹیشنز پر متفقہ فیصلے کے تحت کام چھوڑ ہڑتال کی جا رہی ہے۔
ملازمین کا کہنا ہے فائر فائٹرز اب کسی بھی حادثے کی صورت میں اسٹیشن سے فائر ٹینڈرز نہیں نکالیں گے۔
ملازمین کا مؤقف ہے کہ فائر رسک الاؤنس ديا جارہا،تنخواہوں کی ادائيگی بھی تاخير کا شکار ہے اور ان مطالبات کے حل نہ ہونے تک اسٹيشن سے فائرٹينڈرز نہيں نکاليں گے۔
فائرفائٹر ویلفئیر آرگنائزیشن کے مطابق ملازمین کا یہ بھی کہنا ہے کہ ایک ماہ سے تنخواہوں کی ادائیگی بھی نہیں کی جا رہی اور 3 ماہ سے تنخواہ میں ہونے والا اضافہ بھی نہیں ملا۔
فائر فائٹر ویلفئیر آرگنائزیشن کی مرکزی کمیٹی کے رکن محمد ارشد کا کہنا تھا کہ گزشتہ 17ماہ سے فائر رسک الاونس نہیں ملا، اس وقت تک کام شروع نہیں کریں گے جب تک فائر رسک الاؤنس نہیں ملتا،تاہم جہاں انسانی جان کا معاملہ ہوگا وہاں صورتحال دیکھ کر کمیٹی فیصلہ کرے گی۔